KHAWTHLIR

Zirlai páwlin dem
Mizo Zirlai Pawl (MZP) General Headquarters leh Students' Self-Support Union (SSU) chuan a hrang ve vea thuchhuah siamin, Lalmuankima (16) s/o H Lalnunthara, Tualpui khua, Khawzawla HSLC exam-a awm mek March 17, Pathiannia mi kut tuara a thi chu pawi an tih tak zet thu leh a chhungte an tawrhpui thu an tarlang. Lalmuankima kut thlaktute chu man chhuah a, dan anga na taka hrem ngei an phût thu an tarlang bawk.

Tlawng lui humhalh
Maubawk Branch YMA chuan, Tlawng lui (Reiek kai)-a PHE tui lâkna aṭanga a hnár lam, Lungbelchhuang thleng chu humhalh tlat a ni tih an tarlang a, "He lai hmun hi Aizawl khawpuiin kan tui tlan ber lakna lai a ni a, tui a lo thianghlim zawk nan leh luia nungchate inthlah pun nan khauh taka humhalh a ni," an ti. An humhalh chhunga nungchate eng hmang pawha man khap a nih thu an tarlang.

Thu thlen theih
Lok Sabha inthlanpui leh Aizawl West-I Assembly constituency bye-election neih turah, inthlan kaihhnawih hriat fiah duh emaw, lungawi lohna nei tan Aizawl DC Office control room telephone no. 0389-2316719 ah zawhfiah theih a ni. Rualbanlote'n vote an thlakna tur chungchangah harsatna nei tan telephone no. 0389-2313833 leh 18003453690 (toll free)-ah zawhfiah theih a ni bawk.

WWD Water Rally
March 22, Zirtawpnia World Water Day khuhhawnna atan nimin zing khan PHE department leh Central YMA-in Aizawlah Water Rally an buatsaih a, Aizawla YMA branch hrang hrang aṭangin mi 200 chuang an tel. Rally-ah hi Chanmari kâwn leh Sikulpuikawn aṭanga ṭan a ni a, Vanapa Hall kawtah an intawk khawm a ni. Vanapa Hall kawta hun hman zawhah Aizawl Thunders Bullet Club-te'n Water Rally neiin Aizawl khawpuiah an tlân kual ve leh bawk.

MNF-in lawmawm ti
MNF party chuan thuchhuah siamin, Mizoram Assembly budget session kal mekah, March 15, 2019-ah MPC member Vanlalhlana private resolution put luh, 'UNO thupuan 2007 bawhzuina tur' thu MNF sorkarin a pass pui chu lawmawm an tih thu an tarlang.