Inthlan atan nomination file theih a ni ta

Chief electoral officer (CEO) Ashish Kundra chuan nimin khan CEO Conference Hall-ah thuthar thehdarhtute a kâwm a; April 11, 2019-a Mizorama Lok Sabha inthlan leh Aizawl West-I Assembly bye-election neih turah Election Commission of India (ECI)-in nimin khan notification a tichhuah thu leh, chuh tumte tan nomination paper thehluh theih a nih tawh thu a puang.

CEO chuan, "ECI-in notification a tichhuak tawh a, inthlan chuh tumte tan returning officer (RO)-te hnenah nomination a file theih tawh a ni," a ti a; Lok Sabha inthlan atana RO chu Aizawl DC Vanlalngaihsaka a ni a, Assembly bye-election atana RO chu H Lalhmingthanga, SAD deputy secretary niin, Assistant RO chu H Lalrinpuia, settlement officer a nih thu a sawi.

Inthlan atan hian March 25, 2019 thleng nomination paper thehluh theih a ni a, March 26-ah nomination endik tur niin, March 28 thleng inhnuhdawh theih a ni ang. March 20-ah EVM sem thawh khatna neih a ni dawn a, March 29-ah a thawh hnihna mneih tur a ni. April 2-ah Aizawl, Serchhip, Champhai, Mamit leh Kolasib district-a hman tur EVM tihfel a ni dawn a, April 3-ah Lunglei, Lawngtlai leh Siaha district-a hman turte tihfel a ni ang.

CEO chuan, silai kawltute chu harsatna an tawh loh nan leh sorkar danin a phût angin, an silaite tung vek turin a ngen a; ECI-in cVigil application a siam chu android leh IOS phone-ahte download theih a nih thu sawiin, "Hemi hmang hian Model Code of Conduct bawhchhiatnate thlalak leh a hmun awlsam takin complain a thehluh theih a ni. Tun dinhmunah chuan MCC bawhchhiatna report kan la dawng lo," a ti.

Ashish Kundra chuan, ECI aṭanga thupek an hmuh angin, Tripura camp-a awm mek Mizoram Bru-te tan Kanhmunah polling station 15 siam a nih thu a sawi a; polling station 15 zinga pakua chu Mamit district-a vote neite tan ruahman niin, Kolasib leh Lunglei district-a vote neite tan polling station pathum ve ve ruahman a nih thu a sawi bawk.