March 2019 ral hmaa Tuichawngchhuah Ṭhiat turin MSU-in Mizoram sorkar an phût

Mizo Students Union (MSU) General Headquarters chuan, Lunglei district-a dan loa khaw din, Tuichawngchhuah chu tun thla, March ral hma ngeia ṭhiah turin Mizoram sorkar an phût a; March thla chhunga ṭhiah a nih loh chuan MSU-in hma an lak dawn thu an puang.

MSU hruaitute chuan nimin khan Aizawl Press Club-ah thuthar thehdarhtute an kâwm a; MSU president Vanlalliana Khiangte chuan, Tui­chawngchhuah khua chu Mizoram sorkarin dan loa khaw din a ni tih a puan tawh a nih thu sawiin, High Court-a thubuai a awm hnuah High Court pawhin ṭhiah phalna a pek tawh a nih thu a sawi.

Vanlalliana Khiangte chuan, Tuichawng­chhuaha chengte an insawn chhuaha an awmna turin sorkarin Tuichawng khuaah hmun a ruahman tawh tih sawiin, "Kan sorkar hi rang leh chak taka hma la turin kan phût a, March 2019 ral hmaa sorkar kutthlakna kan hmu lo a nih chuan MSU-in ṭha kan tih ang­in hmalakna kan kalpui tawh dawn a ni," a ti a; Mizo mipui thlàwpna a ngen nghal.

MSU hruaitute tarlan danin, Tuichawngchhuah hi Tuichawng V/C huam chhunga mi a ni a, sorkar report-a a lan danin, in 49 awmin, mi 222 an chêng. Sorkar report hi a dik lo hul hual tih sawiin Vanlalliana chuan, "Thu dik lo hul hual a nihzia a hmun ngeiah kan fiah tawh. January 2019-a MSU Sub-Headquarters Lungsen-te leh Tuichawng V/C-te a hmuna an enfiahnaah in 14 a awm a, in pakhat sak belh an tum mek chu ṭhiahtir nghal a ni," a ti.

An sawi danin, December 17, 2015-ah Lung­lei Additional DC-in Tuichawngchhuah ṭhiahna tur thupek, Eviction Order a chhuah a, chu chu Tuichawng headman-in January 2016-ah Gauhati High Court-ah a khing a, High Court Aizawl Bench-in stay order a tichhuak. High Court chuan August 24, 2018-ah Judgement & Order a tichhuak a, Tui­chawngchhuah chu sor­karin a duh chuan a ṭhiah theih thu leh The Lushai Hills District (Village Councils) Act, 1953 behchhanin Eviction Order a siam theih thu a tarlang.

High Court-in Tuichawngchhuah ṭhiah phalna a tichhuah hnuah tun thlenga Mizoram sorkarin kut a la thlak lo chu mak an tih thu sawiin MSU hruaitute chuan, Mizoram sorkar chu chak leh rang taka hma la turin an phût tih a sawi a; Lok Sabha inthlan dawn hnaih ni mah se, Model Code of Conduct-in a phuar lo tih sawiin, "Chief Secretary kaihhruai Screening Committee-in a tichiang vek tawh a ni," an ti.