Farm-a vawkte PRRS vangin tihral vek tum

AH&Vety minister Dr K Beichhua chuan, Lawngtlai district-a Mampui khuaa Vety Farm-a vawk awmte'n PRRS an vei vek tawh thu sawiin, chuvang chuan vawkte chu tihral vek tum a nih thu Assembly House a hrilh.

Nimina Assembly session-ah MNF member Dr Thiamsanga zawhna kal zela zawhna dang chhangin Dr K Beichhua chuan, Mampui Vety Farm-a vawkte'n PRRS an vei vek tawh avangin no nei turin an fit (ṭha tâwk) tawh lo tih a sawi a, "Dispose vek tum a ni a, dispose hnuah sterilise (tihthianghlim) vek tur a ni a, chumi hnuah a thara vawk vulh leh tum a ni," a ti. Ar note keutirna (hatchery) chu hman theiha a ṭhat thu a sawi.

Dr K Beichhua chuan, Mizorama PRRS leng tur venna atan kumin January thla tir aṭangin state páwn aṭanga vawk lak luh khap a nih thu a sawi a, "Tunah chuan PRRS a lêng tih report kan la dawng lo. Myanmar lam aṭanga vawk lak luh ṭhinte Ruantlanga test vekna turin hmalak mek a ni," a ti.

AH&Vety Minister chuan, Champhai Milk Processing Plant hluihlawn tawh chu a kalphung tidanglam hreta tihnun leh tum a nih thu sawiin, kumin kum tir lamah sorkar laipuiah DPR an thehluh tawh thu a sawi a, "Kan hlawhtlin chuan Mizoramah chilling plant din kan tum," a ti.