Lok Sabha-ah ruling leh ruling lo a la awm lo - Tetea Hmar
Lok Sabha inthlan tura ZPM leh Congress party-in mipui candidate atana an vawrh chhuah Lalnghinglova Hmar chuan, tun ṭum Lok Sahba inthlan turah ruling leh ruling lo a awm hran loh thu a sawi.
Nimina hmar tlangdung khaw hrang hrang a tlawhnaah Lalnghinglova Hmar chuan thu sawiin, "MLA inthlan a zo tawh a, state-ah chuan MNF-in sorkarna an siam tawh. MP hnathawhna hmanraw pakhat MP fund pawh ruling leh ruling lo neih zat a inang vek a. MP inthlanah chuan ruling an awm lo a, rulling tur kan thlang dawn. Tun ṭumah hian BJP thláwp leh thláwp lo kan inkhing dawn a, kei chu BJP thawhpui lo lam ka ni," a ti.
Lok Sabha inthlan tur chu zu zawrh leh zawrh loh nen a inkaihhnawih lo tih sawiin Tetea Hmar chuan, "State inthlanah MNF an sorkar a, zu khap turin hma an la mek. Kei hi thlan tlin ni ila, zu zawrh leh zawrh lohin nghawng a nei lo a, thutlukna siam a ni vek tawh," a ti a; Lok Sabha MP chu Mizoram aiawha Central-a roreltu tur thlanna tur a nih thu a sawi.
A khingpui turte'n la nau deuh tih an sawi ṭhin tih tarlangin Lalnghinglova chuan, "Kum 42 ka ni ve dawn tawh a, ka chak vanglai, ka thluak pawh a chak lai taka ram tana pên chhuah ve ka duh a ni. Kan ṭhenawm state-a ṭhalai kum 40 pawh tling lote Parliament House-ah an au a, chutiang chu Mizo ṭhalaite hian kan thei ve tur a ni," a ti.
Lalnghinglova Hmar hi MLA inthlan hnuhnung bera Tuivawl biala Congress party candidate RL Pianmawia leh ZPM candidate K Romawia te, Chalfilh biala Congress candidate LT Hrangchal leh ZPM candidate Rualhleia ten an ṭawiawm a ni.