Lirthei chhiah pekna dan thar pass a ni

Kum 15 chhung atana ṭum khata lirthei chhiah pekna dan siamṭhatna, The Mizoram Motor Vehicles (Taxation) (Amendment) Bill, 2019 chu March 18, Thawhṭanni khan Assembly House-ah pass a ni.

The Mizoram Motor Vehicles (Taxation) (Amendment) Bill, 2019 hi Transport minister TJ Lalnuntluanga'n House-ah a pu lut a, sawiho a nih hnuah pass a ni. TJ Lalnuntluanga chuan, dan thar hnuaiah chuan lirthei tharah kum 15 chhung atana ṭum khata chhiah pek ngei ngeina tur chu tihbo a nih thu leh, chhiah pek zat turah kum 5, kum 10 leh kum 15-te duh thlan theih a nih tawh tur thu a sawi.

Bill-a tarlan danin, lirthei thar hlak chu kum 15 atan ṭum khatah chhiah pe tla nghal duh tan lirthei man aṭanga chhûta 6% pek tur a ni. Ṭum hnih (two instalment) peka hmang duh tan kum hmasa kum 10 chhung atan lirthei man aṭanga 4.2% pek tur a ni a, kum 10 hnu, a kum 11-naah kum 5 dang atan lirthei man aṭanga 2.2% pek leh tur a ni. Chhiah pek zawng zawng chu lirthei man aṭangin 6.4% a ni ang.

Vawi thum (three instalment) peka hmang duh tan kum 5 zel atan pek theih a ni a, ṭum thum pekah hian lirthei man aṭanga 2.2% zel pek tur niin, a vaiin 6.6% pek a ngai dawn tihna a ni.