KHAWTHLIR

Media training
Aizawl District Election Officer chuan nimin khan Agriculture directorate conference hall-ah Lok Sabha inrthlanpui leh Aizawl West-I Assembly bye-election neih tura inbuatsaihna atan 'Training on Media Certification and Media Related Matters' an buatsaih. He hunah hian Media Certification & Monitoring committee (MCMC) member te, journalist-te leh political party hrang hrang aiawhte an tel a; IPRO Andrew H Lalremruata, master trainer-in thil pawimawhte a hrilhfiah a ni.

Ran entirna
AH&Vety department chuan March 18, Thawhṭanni khan Bungtlang khuaa ran vulhtute tan ran entirna hun, Animal Health Camp an buatsaih. He hunah hian Serchhipa Vety officer Dr C Zarzokima leh a thawhpuite'n ran 1,194 dinhmun an enfiah a, ui a hri danna ARV-in ui 32 an chiu a ni.

MZP-in râl
MZP General Headquarters hruaitute chuan, March 17, 2019 tlaia Khawzawla kutthlak rawn a nih vanga thi ta Lalmuankima, Tualpui, HSLC exam mek chu nimin khan an chenna inah an râl. MZP hruaitute hi an president L Ramdinliana Renthlei hoin an kal a, a pa hnenah ràlna sum an hlan bakah, a thlàn an tlawh a ni.

STYO an lâwm
Saitual Town Youth Organisation (STYO) chuan thuchhuah siamin, Mizoram sorkarin budget a pharh hmasak ber, nimina Chief Minister-in a pharh tâkah Saitual district tihhlawhtlinna tur sum, April-July 2019 chhung atan cheng nuai 150 dah a ni chu lawmawm an tih thu an tarlang a, "Mizoram sorkar chungah kan lawm tak zet a, budget pu luttu leh ruahmantu kan CM Zoramthanga chungah thinlung takin lawmthu kan sawi a ni," an ti.

Scrub typhus zirho
Integrated Diseases Surveillance Programme (IDSP) chuan nimin khan Health Services directorate conference hall-ah medical officer-te tan training an buatsaih a, IDSP state nodal officer Dr pachuau Lalmalsawma'n kaihruaiin, Health principal director Dr F Lallianhlira'n a hmanpui. Training-ah hian rannung seh natna scrub typhus hluar zualna hmuna medical officer (doctor)-te an tel a, scrub typhus leh a kaihhnawih natna chungchang zirho a ni.