Mizoram puma naupang enkawlna Home 52-ah naupang 953 an awm

Mizoram State Commission for Protection of Child Rights (MSCPCR) hotute chuan, Mizoram pumah naupang awmna/enkawlna home/centre 52 a awm mek thu leh, chu'ngah chuan naupang 953 an awm mek thu an sawi.

MSCPCR hian nimin khan Aizawl Press Club-ah thuthar theh­darhtute pualin naupang enkawlna leh venhimna chungchang sawihona an buatsaih. Zawhna chhanga MSCPCR hotute sawi danin, Mizoram puma naupang enkawlna home 52-ah naupang 2,084 an awm thei a, February 28, 2019 report ang chuan naupang 953 awm mekin, mipa 557 leh hmei­chhia 386 an ni.

MSCPCR chairperson Sangzuali Vanchhawng chuan, Mizoram puma naupang enkawlna 52 awm mek chu state chhunga mihring awm zat (population) ngaihtuahin a tam lutuk tih a sawi a, "Naupang home chungchangah hian ngaihdan thlak a ngai nasa... Home-te hi sorkarah an inziak lut thlap tur a ni," a ti.

Sangzuali Vanchhawng chuan, naupang reng reng chu duh thlan tur dang a awm ngang lo a nih chauh loh chuan home-ah dah loh tur a ni thu sawiin, "A chhan chu an ṭhan len nan chhungkua a ṭha ber, hei hi psychology pawhin a dik a ni. Home hi rei lo tê atan a ni a, kum 18 thleng awm phal a nih rualin, kum 18 an tlin hun nghah thlen kher a ngai lo," a ti a; tunah erawh chuan home hrang hrangah naupangte an awm rei lutuk veka a lan thu a sawi.

Mizorama naupang enkawlna home 52 chu naupang 2,084 an awm theih a nih laiin, naupang 953 awm mek mah se, home ṭhenkhatah chuan awm thei zat aia tam fé an awm thu sawiin Sangzuali chuan, "Naupang home ṭhenkhatah an tam lutuk avangin sorkar dan anga an mamawh (facility) pek tur ang an pe lo nasa. Hetianga awm thei zat aia tam daih an awm chhan hi naupangte an awmpui rei lutuk a, an chhungte hnenah an pek lêt ngai loh vang a ni," a ti.

Naupang himna tur leh naupangte enkawlna kawnga sorkarin dan a neihte chu a hriam hle tih sawiin Sangzuali Vanchhawng chuan, dante chu zâwm vek turin naupang enkawlna home zawng zawngte a ngen a, "Dik takin kalpui se kan duh. Dan lekkawhtu tur kan nih angin, authority kan hman loh theih loh hun a awm dawn a ni," a ti.

MSCPCR Chairperson chuan, mi ṭhenkhatin Mizorama home ṭhenkhat chu hnam dang mikhualte an tlawhpui ṭhin tih sawiin, "Home-te hi hnam dangte tlawhtir ziah loh a ṭha. Home-a naupangte leh mi tam tak an awm hi chhuanawm loh a, a zahthlak zawk a ni," a ti a; sorkara inziak lut home-te chu sorkarin ṭanpuina a pek ṭhin thu a sawi bawk.

Zawhna chhangin MSCPCR member J Malsawmzuala Van­chhawng chuan, sual rapthlak bik (heinous crime)-a ngaih ti zingah kum 18 la tling lo, kum 16 tling tawh si an awmin, criminal case anga kalpui theih ni mah se, an hming leh nihna erawh media-a puanzar khap tho a nih thu a sawi.

March 17, Pathianni tlaia Khawzawla tleirawl pakhat kutthlak rawn vanga a thihnaa mawhphurhtua puhte chu kum 18 la tling lo vek an nih laia social media-a an hming leh nihna thehdarh a nih chungchangah pawh MSCPCR hian hma an la a ni.