Bill pass vangin MNF an lawm

MNF party chuan thuchhuah siamin, Assembly budget session neih mekah chief minister Zoramthanga, GAD changtu hmalaknain 'Mizoram Maintenance of Household Registers Bill, 2019' pass a ni tih an tarlang a; lawmawm an tih thu sawiin, "Bill hi dan loa Mizorama lut ru foreigner-te chhuahtirna tur a nih avangin ram neitu tawh phawt chu an lawm turah kan ngai," an ti.

MNF chuan, "Tunlaiah foreign aṭanga lut rûte hi tharum hmanga ûm kîr rum rum a rem loh ṭhin avangin, khua leh tuite chhinchhiah hi foreigner-te chhuahtirna hmanrua ber a ni," an ti a; chuvang chuan, khua leh tuite chhinchhiahna tur dan Mizoram Maintenance of Household Registers Bill, 2019 pass a ni chu thlamuanthlak an tih thu an tarlang.

Bill pass tâk chu foreigner laka invenna chauh ni loin, suahsualna leh pawikhawihna thil laka invenna leh chhui nan pawh a ṭangkai dawn nia sawiin MNF chuan, "Khua leh tui chhinchhiah a nih chuan dan loa rawn lut ru foreigner-te tel loin khua leh tuite chauh sorkar programme leh scheme hrang hrangin a huap phah theih dawn a, ram leh hnam tan kawng hrang hrangin a ṭangkai dawn a ni," an ti.