ART centre hnathawhte thlir let
HIV veite inenkawlna, Anti Retroviral Therapy (ART) damdawi sem chhuahnaa thawktute'n nimin khan Mizoram State AIDS Control Society (MSACS) conference hall-ah kum
khat chhunga an hnathawh thlir letna hun, Annual Review Meeting an nei a, MSACS project director Dr Lalthlengliani'n a hmanpui.
Dr Lalthlengliani chuan, Mizorama ART centre paruk awm mekte chu sorkar damdawi-in behchhana kalpui a nih avangin hawn hun leh khâr hun a awm a ngai tih a sawi a, "ART damdawi hi a dawngtu turte'n an remcham huna an dawn theih dan tura hawn hma emaw, khâr tlai deuh emaw kan inhuam a ngai a ni," a ti. ART damdawi sem chhuahna lama hnathawhna tihchakna tur programme thar pali a puang nghal.
Programme thar palite chu
1. Multi Month Dispensation: ART damdawi ei ṭhate tan thla thum chhunga an ei tur pekna
2. Community Refill: NGO hmanga awlsam zawka ART damdawi sem chhuahna tur
3. Co-Located ART at OST Centre: Drug ti ṭhinte'n ART damdawi an ei ṭhatna tura ruahmanna
4. Adherence Calculator: A hun takah ART dawidawi an ei em tih chhûtna.
MSACS hotute chuan, Mizoram chu India rama ART damdawi sem chhuahna lama thawk ṭha state pathum zingah a tel mek a; ram chhunga ART centre 520 zinga hna thawk ṭha 60 thlan chhuah zingah Mamit ART Centre leh Kulikawn ART Centre an tel tih an tarlang.