Treasury Account Service an lâwm lo
Mizoram Treasury Accounts Service Association (MTASA) chuan thuchhuah siamin, Mizoram sorkar Finance department-in Saitual, Khawzawl leh Hnahthial-a Treasury office a hawn turah, Treasury officer leh LDC post khat ṭheuh leh group-D staff pahnih ṭheuh atan post siam a remtih laia account staff post a siam miah lo chu ná an tih thu an tarlang.
MTASA chuan, "DR&AR I.D. No. ARW/F.EST/2018-2019/B-274 of 12.9.2018-a accounts officer pakhat leh assistant accounts officer pahnih ṭheuh khing Treasury thar tana treasury hrang hrang aṭanga pawt khawm tura ruahmanna a awm hi mak kan ti a, hriatthiam har kan ti hle a ni," an ti.
Tunah hian Treasury hrang hrangah assistant accounts officer post 76 awmah post 44 chauh hnawhkhah a nih thu tarlangin MTASA chuan, "Thawktu indaih loh vanga over time-a thawk ṭhin kan nih mek laia post thar siam lo leh, post ruak hnawhkhat loa staff awm mekte aṭanga Treasury thar pathum hawnga min sem darh tumna hi kan service hmuhsitnaah kan ngai," an ti a; a rang lama thuneitute inrawlh tura an beisei thu an sawi.
MTASA chuan, Treasury office thar pathum siam turah hian a tlem berah accounts officer pathum leh assistant accounts officer paruk (bill pre check, pension leh compilation section atan) tal an awm loh chuan mumal takin a kal thei dawn lo tih an sawi a, "Accounts staff awm loa treasury office thar pathum hawn tumna hi MTASA chuan ṭha kan ti lo a, treasury function nana accounts staff mamawh zat post thar siam ngei turin sorkar kan beisei a ni," an ti.