Serchhipah Hriata Chhangte inpuangzar
April 11, 2019-a Lok Sabha inthlanpui neih tura independent-a chuh tum Lalhriatrenga Chhangte chuan amah thlawptu Mizo Democracy Warrior hruaitute nen nimin khan Serchhip Bazara Jemela Hotel-ah Serchhipa thuthar thehdarhtute an kâwm a;
MP-ah thlan tlin a nih chuan, sorkar laipui chu a ṭul huna thláwp a, a ṭul huna do thei nih a ṭul niin a sawi.
Lalhriatrenga Chhangte chuan, Mizoram aṭanga MP ni turin mi hrang hrangin an awh thu an hrilh hnuah Lok Sabha MP nih tuma hma a lak thu a sawi a; Mizorama political party-te'n tun hmain an party mi upa tawhte indah bona atan MP an hmang ṭhin nia sawiin, "Kei chuan tum neiin, phûr takin MP nih ka tum. Sâwm chhuah chawp ngai loin, missionary rilru pua MP ni turin ka pên chhuak a ni," a ti.
MP a nih chuan MP-LAD Fund hmannate mi tinin an hmuh theih turin website-ah dah zel a ni dawn tih sawiin Lalhriatrenga chuan, MP-te'n 25% an bial chhung ni loa an hman theih avangin India ram hmun danga MP fund-te pawh Mizorama hmantir dan a zawn tur thu a sawi a; MP a nih chuan Assam leh Mizoram ramri tihchianna atan MP fund aṭangin cheng nuai 50 a pek nghal tur thu a sawi bawk.