Goa Chief Minister thar Pramod Sawant lalut : Vawiinah sorkar fiah nghal dawn

Goa Chief Minister thar atan Thawhṭanni zan khan kum 45 mi, BJP MLA Pramod Sawant chu ruat a ni a, nimin zing dar 2 khan rinawmna thu tiamtira lakluh nghal a ni. Vawiinah Sawant-a kaihhruai sorkar chu Assembly-ah fiah nghal a ni ang.

CM thar Pramod Sawant chuan Thawhṭanni tlaia vui liam tak, Goa chief minister a nihlaia thi Manohar Parrikar chu state pumah ni sarih chhung sunna hun hman a nih dawn avangin CM atan lakluh a nih hnuah pawh a lawmna emaw, lawmpuina pangpar emaw pe lo turin mipuite a ngen nghal a ni.

Kum 1973, April 24-a piang, Pramod Sawant-a hi Goa chief minister 13-na a ni. Sanquelim constituency MLA niin CM atana ruat a nih hma hian Assembly speaker a ni. Kolhapur-a Ganga Education Society hnuaia Ayurvedic Medical College aṭangin Bachelor of Ayurveda, Medicine and Surgery degree a nei a, Pune-a Tilak Maharashtra University aṭangin Social Work-ah master degree a nei bawk.

Manohar Parrikar a thih avangin amah thlaktu tur hi BJP leh ṭangrual sorkar a siampui, Maharashtrawadi Gomantak Party (MGP) leh Goa Forward Party (GFP)-te chuan an ngaihtuah nghal a, Pathianni zan aṭangin ngaihtuah mah se inremna an siam mai thei lo a, Thawhṭanni zanah thutlukna an siam thei ta chauh a ni.

Pramod Sawant kaihhruai sorkar hian Vijay Sardesai (GFP) leh Sudin Dhavalikar (MGP)-te chu deputy CM atan a dah bawk. CM thar rual hian a cabinet minister 12, deputy CM pahnih tel hian lakluh nghal an ni. Minister-te hi Parrikar-a kaihhruai sorkara minister ngaite vek an ni.

Seat 40 awmna Goa Assembly-ah hian BJP MLA pahnih an thih vang leh, Congress MLA pahnih an ban avangin member 36 an awm mek a ni. Sawant-a hian fiahna paltlangin member 19 thlawpna a neih a ngai ang. BJP hian MLA 2 an nei mek a, MGP leh GFP hian member pathum ve ve an nei a ni. Congress chu party mala seat la hnem ber niin MLA 14 a nei a ni.