KHAWTHLIR

Thisen pe
Mizoram Law College NSS chuan nimin khan Aizawl Civil Hospital Blood Bank-ah thisen unit 24 an pe a, petute mipa 19 leh hmeichhia panga an ni. Mimala a thlawna thisen pe (individual voluntary donor) mi 28 an awm bawk.

Kuhva rah man
Assam Rifles leh Champhaia Custom Preventive Force-te chuan nimin khan Mélbûkah kuhva rah ip 150 an man a, Rs. 37,56,000 man a ni. April 18, Pathianni khan Vaphai ram chhungah kuhva rah ip 395 an man bawk a, Rs. 74,18,100 man a ni.

Zehtet VC inthlak
Lunglei South Assembly constituency huam chhunga Zehtet khuaa MNF party mi VC member-te MNF chhuahsanin Congress party an zawm a; hei vang hian Zehtet khuaah hian Congress party kaihhruai VC a ding tih Lunglei District Congress Committee chuan an tarlang.

In chhia enfiah
Nimin zinga thli tleh leh ruahsurin Tlangnuam Vengthara chenna in leh ran-in a tichhe nual a, nimin zing vek khan bialtu MLA Lalchhuanthanga leh bialtu councillor Baryl Vanneihsangi Tlau ten a hmunah an enfiah a, in chhia siamṭhat hna thawka hnatlangte tan Tlangnuam Vengthar Branch YMA hnenah Rs. 2,000 an pe. MLA-in DMR leh DC lamah rângva leh silpauline a ngaihtuahsak bawk.

SRH-ah mi 28 awm
State Referral Hospital-ah nimin khan Covid-19 vei mi pathum dah luh niin, mi pahnih chhuahtir an ni a, mi 28 an awm mek. SRH-ZMC Bulletin tarlan danin, mi 28 zinga pahnih chu ICU-ah awmin, pakhat zawk chu ventilator hmantir a ni a; Isolation ward-a awm mi 26 zingah harsatna lian tham nei an awm lo.

Sample lakna
Kolasib Chief Medical Officer chuan vawiin aṭangin Covid-19 swab sample lakna hmun chu SIRD Hostel, Kolasib Vengtharah tih tawh tur a nih thu a puang. Sample collection team-te chu RBSK vehicle leh pool vehicle hmanga hruai ṭhin tur a nih thu a tarlang bawk.