Vawk chânte zangnadawmna pek chungchang sorkarin a la ngaihtuah lo - AH & Vety dept.

Mizorama vawk hri, African Swine Fever (ASF) léng vanga vawk chánte hnena zangnadawmna pek chungchang Mizoram sorkarin a la ngaihtuah lo.

Animal Husbandry & Veterinary (AH&Vety) department hotute chuan Vanglaini palai zawhna chhángin, tun hnaia vawk hri lènna, infected area-a puanna hmuna vawk awm zawng zawngte chu ASF hri laka inkaihhruaina (guidelines) ang chuan tihhlum vek tur a nih thu an sawi.

AH&Vety hotute chuan, infected area-a vawk hri kái leh hri la kái lo zawng zawngte chu fimkhur thilah tih­hlum vek tur a nih thu an sawi rualin, "Chumi tur chuan vawk neitute hnenah an vawk hlutna mil zangnadawmna pek a ngai. Sorkar sum indaih loh lai a ni bawk nen, zangnadawmna pek chungchang ngaihtuah theih a ni rih lo," an ti.

State páwn aṭanga vawk la lut duh tan AH&Vety department phal­na lak tur tih chung changa bawrhsapte thuchhuah awm chu thil hriat sual palh vang a nih thu AH&Vety hotute chuan an sawi a, "State dang aṭanga vawk lak luh hi phal loh a ni a, dil an awm pawhin kan pe lo ang," an ti. ASF chu vawk natna bik a nih avangin ran dang (bawng, ar, adt.) tan a hlauhawm loh thu an sawi bawk.

Nimin khan Aizawl, Lunglei leh Mamit district-ahte vawk 65 a thi leh a, Lungsenah 17, Lunglei Electric Vengah 20, Mamit district-ah pasarih leh Armed Vengah 13 a thi.

Heti hian March 21, 2021 aṭanga nimin thleng khan Mizoramah ASF vangin vawk 920 a thi tawh a ni. Hetih lai hian, Ser­chhip district-a Keiṭum khuaah pawh ASF hri kái vawk a awm tih hmuh chhuah a nih tawh thu, AH&Vety department hotute chuan an sawi.