Upate tana hma la ṭhate chawimawina hlan a ni

Social Welfare minister Dr K Beichhua chuan nimin khan Social Welfare directorate confe­rence hall-ah kum lama upate puala hma latute hnenah chawimawina a hlân.

Dr K Beichhua chuan, chawi­mawina dawngtute'n upate puala hma an lakna chu entawntlak a tih thu sawiin, "Ṭhangtharte tan entawn tur ṭha tak in hnutchhiah a ni. Aia upate zah ṭhin hnam kan ni a, tun hnaiah kan khawtlangah upate zahna a tlahniam hlein ka hria. Aia upate zahna kawngah te, duat leh enkawl kawngahte kan harh thar a pawimawh. Tuna ṭhalaite pawh nakina upa la ni tur vek kan ni a, kan hmalakna hi keimahni tana kawng kan sialna a ni," a ti.

Chawimawina hi pawl/ depart­ment/ kohhran pali hnenah hlan a ni a, Rs. 20,000 leh chawimawina thuziak pek a ni.