Melthumah hnam dangte sample Endik rûnpuiah hripui vei 19 hmu

Melthum Local Task Force hmalaknain April 18, Pathianni khan Melthum huam chhunga hnam dang awmte swab sample endik rûnpui neih a ni a, Covid-19 vei 19 hmuh chhuah a ni.

YMA, Melthum Branch vice president Lalremruata'n Vanglaini a hrilh danin, an veng chhunga hnam dang awmte chu mi pali/ panga vel tê têa in luah an ni a, an zinga pakhat ṭheuhte swab sample endik a ni. Covid-19 positive an awm tak nual avangin in an luahpuite pawh an endik ta vek a, hripui vei mi 19, hnam dang vek an hmu chhuak ta a ni.

Hnam dangte sample an endiktir chhan zawhna chhángin Lalremruata chuan, "Tun hnaia Assam inthlana vote thlak tura zuk haw, rawn lêt leh an awm nualin kan hria a, tu tute nge tih leh an rawn lêt hun tak kan hre mai thei lo. Chuvang chuan, a huhoa in luahtu mi panga vel zing aṭangin pakhat ṭheuh kan test ta phawt a, positive an awm tâk nual avangin in an luahpui mi dangte pawh kan test ta vek a ni," a ti.

Lalremruata chuan, hnam dang 19 lai Covid-19 positive an hmuh tak avangin anmahni nena inhnaia awm Mizote pawh nimin khan RAT hmangin endik ve leh nghal an nih thu leh, tlai dar 3 vel thleng khan positive 10 an hmuh belh tawh thu a sawi.

Nimina Melthuma Mizo zinga Covid-19 vei hmuh chhuahte erawh hi chu sorkarin sample test result a tih­chhuah tawhah an la tel lo a, vawiin zinga tihchhuahah an tel tura ngaih a ni.