Catch The Rain Rally buatsaih a ni

Nimin khan Champhai leh Khawzawlah tuihna humhalh leh tui tlante a lo thianghlim zawkna tur atana hmalakna Jal Shakti Abhiyan hnuaiah Catch The Rain Rally buatsaih a ni a, faina hnatlang neih a ni.

Champhaiah chuan District Rural Development Agency (DRDA) leh Champhai College NSS buatsaihin District Water and Sanitation Committee chairman Maria CT Zuali hoin Catch The Rain Rally neih a ni a; Champhai College péng aṭanga DC Complex, Falkawn inkarah faina hnatlang neih a ni. Champhai College Eco-Club-in ramhmul damdawi phun hnatlang an nei nghal bawk.

Rally-ah hian Champhai College zirlaite'n college péng aṭanga DC Complex inkar kawng dung leh a chhehvela bawlhhlawhte an chhar fai a, UDPA-in an tum sak garbage bag lian 103 khat an chhar a ni.

Khawzawlah pawh DRDA bultumin nimin zing dar 6:30-ah khawpui chhungah Catch the Rain Campaign Rally buatsaih a ni a, Zaingen YMA Hall kawtah ṭanin, SBI kawt thlengin kawng dunga bawlhhlawhte an chhar fai a ni. Rally hi bawrhsap Zothanmawia'n a vailiam.

Khawzawl khawpuia Catch the Rain Campaign Rally an neih rual hian Kawlkulh leh Chawngtlai khuaahte pawh MZSRLM hnuaia self help group intélkhawmte'n Rally an nei ve bawk.