Minister C Lalrinsanga chawimawi

Mizoram State Co­operative Service Asso­ciation (MSCSA) chuan nimin khan Cooperation minister C Lalrinsanga chu MSCSA a enkawl danah an lungawizia leh a laka an lawmzia lantir nan chawimawina thilpek an hlân.

C Lalrinsanga chuan, sorkar hnathawkte'n harsatna an tawh hrang hrang sorkarin a hria tih sawiin, "A theih chin chinah chinfel zel hi sorkar duh dan a ni. Chutih rualin, sorkar hnathawkte pawhin kan harsatna tawh leh kan facility piah lamah, kan hna hi Pathian rawngbawl hna a ni tih hre thar leh ila, i ṭang thar zel ang u. Ram min petu Pathian duh dan ang taka ram ropui ni turin taima tak leh rinawm takin i thawk ang u," a ti.

MSCSA tarlan danin, kum eng emaw zat chhunga an service chungchanga harsatna an lo tawh ṭhin hrang hrangte chu minister C Lalrinsanga'n kum 2018 tawp lam aṭanga Cooperation department a enkawl hnuah chinfel a ni.