ZPM kan chak ngei kan beisei - ZPM Vice President

ZPM vice president K Sapdanga chuan nimin khan an party pisaa inkhawmah thu a sawi a; Serchhip biala Assembly by-election neih zawh tak boruak leh mipui mimir sûkthlêk thlirin, ZPM an chak ngei an beisei thu a sawi.

K Sapdanga chuan, Serchhip bial mipuiin Lalduhoma chungah rinna an la nghat nia a lan thu sawiin, "Kan thla a muang tak zet. Campaign chhungin bial mipui leh khawtlang hruaitute sorkar duh loh zawng leh mit tikham záwnga khawsa kan awm lo niin kan hria a, kan lawm hle. Kan inthlan boruak leh mipui mimir sûkthlêk thlirin, kan chak ngei kan beisei a ni," a ti.

By-election-ah ZPM mi leh sate'n lungrual takin an thawk tih sawiin ZPM Vice President chuan, "Campaign Committee leh committee péng hrang hrangte an thawkrim a, Zonu leh Ṭhalai lamte'n thâ leh zung mai bakah, báng loa an ṭawngṭai reng avangin kan thla a muang hle a ni," a ti a; MLA leh councillor te, Serchhip constituency chhunga ZPM Serchhip block leh Thenzawl block hruaitute leh unit hruaitute an taimâk tak zet thu a sawi bawk.

ZPM vice president dang Lalthansanga chuan, Thlarau Thianghlimin hna a thawhsak ṭhin tih sawiin, "Campaign hah pawh ngai loin an lo hmin sa diam mai ṭhin. Hmun hrang hranga kan mite an thawhrimzia kan hria a, an fakawm em em. Zonu leh Ṭhalaite thlengin an thawkrim em em a, hmun ṭhenkhatah chuan kan kut leh ke ber an ni. Kan thawhrimna leh ṭawngṭainate Pathianin a chháng ang a, hnehna kan chan ngei kan beisei," a ti.