Lungleiah RT-PCR hman theih nan hma la turin ZPM hruaituin PM ngen

ZPM Southern Headquarters vice president Lalrinpuii chuan nimin khan prime minister Narendra Modi lehkha a thawn a, Lungleiah swab sample endikna ṭha RT-PCR khawl hman a nih theih nan hma la turin a ngen.

Lalrinpuii chuan a lehkhaah, April 14, 2021-a Prime Minister-in state governor-te meeting a neihpuinaah Covid-19 do nan testing, tracking leh tracing a pawimawhzia leh swab sample endik zawng zawng aṭanga 60%-70% chu RT-PCR hmanga endik ni thei se a duh tih a sawi thu a tarlang a, "Hetih lai hian, Mizorama district lian ber Lunglei district-ah tun thlengin RT-PCR hman a la ni lo," a ti.

PM hnena lehkha thawnah chuan, Mizoram sorkarin Lungleiah RT-PCR a la dah loh thu te, mi pakhat (MLA Zodintluanga Ralte)-in Lunglei district tana June 26, 2020-a RT-PCR khawl a pek tawh pawh tun thlenga hman a la nih loh thu leh hman a nih loh chhan chu politics thil vang nia a lan thu te, Lungleia RT-PCR hman tur la awm lo chu district mipui hriselna hlamchhiahna a nih thu leh district mipui tan lungawithlak loh tak a nih thute ziah lan a ni.

Lunglei district-ah TrueNat-PCR khawl pali a awm ṭhin thu te, khawl pali zinga pathum chu March 2021-ah a neitute hnenah pek lêt a nih tawh avangin tunah chuan khawl pakhat chiah a awm tawh thu te, khawl chuan ṭum khatah swab sample pali zel chauh a en theih thute a tarlang bawk a; "Mizoramah Covid-19 vei an pung zel a, Lunglei tan RT-PCR khawl mamawhna a sang tawh hle a ni," a ti.