Congress party-in lawmthu sawi

Mizoram Pradesh Congress Committee (MPCC) chuan thuchhuah siamin, Serchhip biala MLA by-election Pathian hruainaa tluang taka neih a ni chu lawmawm an tih thu an tarlang a; an party candidate PC Laltlansanga tana theihtawp chhuahtute leh vote petute chungah lawmthu an sawi.

MPCC chuan, by-election-ah political party hrang hrangte theihtawpin an ṭang tih sawiin, "By-election Mizorama kan neih tawhah vote tlak ṭhat ber kum niin, candidate-te pawh ram leh hnam tana thawk tura mi ṭha tak tak an ni a, Serchhip bialin MLA ṭha tak a neih ngei kan beisei a, kan duhsak a ni," an ti.

Congress party chuan, inthlan hma lawk, April 15, 2021 zingah Serchhip leh Thenzawl inkara inthlan kaihhnawiha hman tur nia ngaih theih rálthuam ṭhahnem tak Bolero motor pahniha man a ni chu an ngai thutak tih an sawi a, "Mipui himna derthawng thei a nih avangin sorkar hian uluk takin chhui se, mipui tana hriat tur chite chiang taka puang zel turin kan phût a ni," an ti. Bolero pahnih zinga pakhat zawk chesual vanga damdawi-ina enkawl mek chu uluk taka veng turin sorkar an phut bawk.