Samagra Shiksha ruahmanna pawm

School Education minister Lalchhandama Ralte hoin nimin khan SCERT seminar room-ah Samagra Shiksha Annual Work Plan & Budget 2021-22 thlirho a ni a, sorkar laipuia thlen turin an pawm.

Lalchhandama Ralte chuan, Samagra Shiksha officer leh thawktute inpekna leh thawhrimnaah a lawm thu sawiin, "Tun hmaa New Delhi-a appraisal leh PAB meeting neih ṭhin chu hri léng avangin online-a neih a ṭul leh dawn a, Mizoram tan ṭhahnemngai takin i thawk zel ang u," a ti.

Samagra Shiksha Annual Work Plan & Budget 2021-22-ah hian secondary school leh higher secondary school hawn thar tur te, Balvatika (pre-school) hawn thar dan tur te, naupangin thiamna tak tak a neih theih nana zirna kalphung thar neih dan turte a tel.

National Education Policy (NEP), 2020-in a ngaih pawimawh skill development leh vocational education chungchanga zirna kalpui dan tur te, hindi teacher atana rawtna te, zirlai hmeichhiate'n sikulah harsatna an tawh lohna tura ruahmanna siam te, vohbik naupangte tana chet vel awlsamna tur leh inthiarna a hranga siam dan tur te, HSS tan science laboratory leh an room mamawh leh ruahtui khâwlna siamna tur ruahmanna te, district thar pathum tana DIET thar hawnna tura ruahmannate a tel bawk.

Ṭhutkhawmah hian Human Resource Development Board vice chairman L Thangmawia, MLA bakah, School Education secretary Lalzirmawia Chhangte, director James Lalrinchhana, Samagra Shiksha state project director Lalhmachhuana te, School Education, SCERT leh Samagra Shiksha officer-te an tel a ni.