A duh tan coaching kalte hruai haw phal

Mizoram Youth Commission (MYC) chuan, Covid-19 hluar thar leh avangin New Delhi-a coaching academy pahnih - ALS leh Chanakya-a coaching class kal lai, MYC-in senso a tumsak (sponspor) mek Mizo ṭhalai mi 20-te chu an chhungte'n hruai haw an duh chuan rem lohna a awm lo tih a tarlang.

MYC chuan, Mizo ṭhalai 20, coaching kal mekte chu an awmna tura senso ngaite MYC-in June 2021 thleng pe tawh mah se, zirlai nu leh pate’n hruai haw an duh a nih chuan thuneitu lam aṭangin remtih lohna a awm loh thu a tarlang a, "An haw dawn chuan New Delhi aṭanga an rawn hawna air ticket leh airport kalna taxi fare-te MYC-in a tumsak thei ang," a ti.

MYC chuan, Mizoram district hrang hranga army pre-recruitment rally atana training an kalpui mek pawh sipai lâk hun tur sawn a nih avang leh Covid-19 léng a zual zel avangin vawiin aṭangin tiam chin awm loa tihtawp a nih thu an puang. Training chhunzawm hun tur chu inhriattir leh tur a ni.