PC candidate vote-tute chungah lawm

Peoples' Conference party president Lalhmangaiha Sailo chuan, boruak muanawm tak hnuaiah tluang taka Serchhip biala MLA by-election neih a ni chu lawmawm a tih thu leh, an candidate vote-tute chungah an lawm thu a sawi.

Nimina PC party office bearer-te ṭhutkhawmnaah thu sawiin Lalhmangaiha Sailo chuan, PC party candidate Vanlalruata vote-tute chungah lawmthu a sawi a, "PC party a tho leh ṭan a, kar hnih chhung chauh campaign hun kan neih chhungin kan mi leh sa kan tlawh chhuak hman lo. Unit, block leh district organ kan nei mumal lo chunga Brig. T Sailo policy-a lungleng leh ram hmasawnna tak tak duhtu PC party mi nghet an tam a ni," a ti.

PC party President chuan, candidate leh campaigner-te'n political party beih leh sawiselna aia policy an sawi uar chu lawmawm a tih thu a sawi a; by-election atana sorkar official leh MPF-te thawhrimna leh khawng taka campaign leh inthlan an thununnaah lawmawm a tih thu a sawi bawk.