Khawpuia inkhârkhip rêl a ni; Chief Minister-in a pawm a ngai

Mizorama Covid-19 darh zau zel avanga hmalak zel dan tur ngaihtuahin nimin khan Health minister Dr R Lalthangliana hoin sorkar thuneitute leh pawl aiawhte Secretariat conference hall-ah an ṭhukhawm a, chawlhkar khat chhung inkhàrkhip (lockdown) an rél a, he thu ziah lai hian chief minister Zoramthanga thutlukna nghah a ni.

Ṭhutkhawmah hian Covid-19 darh chak lutuk vênna atan district khawpuiah chawlhkár khat chhung inkhàrkhip kalpui rêl a ni. Thutlukna hi chief minister Zoramthanga pawmpui a ngai a, duh thlan turin lockdown, partial lockdown leh no lockdown-te an dah a ni.

He thuziah lai thleng hian CMO chuan file an la hmu lo. Hei vang hian CM thutlukna kan hre hman lo.

Health Minister hoa rêl a nih dan chuan, inkharkhip hi nizan zanlai aṭang khan kalpui nghal tur a ni a, April 26, Thawhṭanni zanlai dar 12 thleng a awh ang.

Meeting chuan, hun hmasa lamah Covid-19 volunteer rawihna senso atan thla khatah cheng nuai 40 chuang sên ṭhin a nih avangin, tunah chuan volunteer hmang tawh loin, sorkar hnathawkte pawh (requisition) turin an rél. Khauh takin sorkar a kal dawn a, thiamna bik ngai chi-ah chauh volunteer lak a ni ang.

Health Minister chuan, Covid-19 darh mek chungchang CM nen an sawi dun tih sawiin, "Aizawl bik hi Mizorama Covid vei 80% awmna a ni a, contact tracing lam pawh kan mumal lo deuh hlek tawh. Chî-âia phílí hauh loin, ṭha deuhin ngaihtuahna hmang ang u. Covid-in vûng a chhuah thar leh lai a nih avangin nikum anga lockdown ang ni chiah si loa kan inkhuahkhirh viau ang khan hmun ṭhenkhatah chuan tih a ngai ang," a ti.

Medical Operational Team chairman Dr ZR Thiamsanga, MLA chuan, Mizoram dinhmun a ṭha lo hle tih sawiin, "Nikuma SOP a khirh lai bera kan kalpui ang khan kan kal leh loh chuan a inenkawlna hi a buaithlak hle dawn. India ramah pawh doctor 800 chuang an boral tawh a, sorkar, NGO, kohhran angtea kan ṭanho a ṭul tak zet. Tuna mi hi chu a symptom a na em em a ni," a ti a; Covid-19 chak taka darh mek chu chhu chat turin lockdown a ṭul thu a sawi.

Chief secretary Lalnunmawia Chuaungo chuan, Covid-19 hriat tirh a?angin sorkar, kohhran, tlawmngai pawl, local council leh village council thawhhona a ṭhat thu a sawi a, "India rama thi leh a hri vei nei tlem ber kan ni. Sorkar hnathawkte hi lockdown pawh a tuar lo ber kan ni a, kan hlawh a ngai reng. Covid-19 do aia pawimawh a awm thei lo. Sorkar hnathawk tan Covid duty hi thiam loh a awm thei lo. Duty tura kan tih ti ṭha duh lo chu report u la, hma kan la ang," a ti.

Ṭhutkhawmah hian Home minister Lalchamliana, sorkar official, Mizoram Kohhran Hruaitu Committee leh Joint NGO aiawh, Medical Operational Team member-te leh mi pawimawh dangte an tel a ni.