Assembly-ah zu khapna dan pass a ni

March 12, 2019-a ṭan, Assembly budget session chu nizan dar 6:56 khan speaker Lalrinliana Sailo-in tiam chin awm loin a titawp. Nimina session-ah Mizorama zu khapna tur dan, The Mizoram Liquor (Prohibition) Bill, 2019 lungrual taka pass a ni a; April 1, 2019 aṭangin zu khap ṭan tum a ni. Zu khap a nih avang hian Mizoram sorkarin chhiah a hmuh tur cheng nuai 7,000 vel a hloh tura ngaih a ni.

The Mizoram Liquor (Prohibition) Bill, 2019 hi Excise & Narcotics minister Dr K Beichhua'n Assembly House-ah a pu lut a, member 20-in sawi zuiin, a thlâwp lo zawnga sawi an awm lo.

Excise & Narcotics minister Dr K Beichhua chuan, zu khap a nih hnuah chuan dan bawhchhiate chu mi tu pawhin an man theih dawn thu sawiin, "Mimal leh pawlte pawhin an man thei dawn a, amaherawhchu, a rang thei ang berin Excise & Narcotics leh Police hnenah an hlan tur a ni," a ti. Draft bill-ah chuan, Excise & Narcotics leh Police-a assistant sub-inspector leh a chung lamte'n case an khawih theih dawn tih tarlan a ni.

Dr K Beichhia chuan, zu khapna tur dan chu ni, MNF tan bik a ni lo a, Congress leh ZPM tan bik a ni lo tih sawiin, "Zoram mipui, kan zavaia tan a ni," a ti a; dan kenkawhna turah Excise & Narcotics ringawt chuan an zo dawn tih sawiin, "Kohhrante nasa lehzuala min ṭawngṭaisak turin kan ngen. CYMA-te CYLA, MTP, YCA-te nasa takin kan thawhho theih ka beisei a, thawkho turin ka sawm a ni," a ti.

Draft Bill-a tarlan dan chuan, dan hnuaia thuneitute'n phalna bik an pek a nih loh chuan, Mizoramah mi tu pawhin zu an lak luh, thawn chhuah, kawl, lei leh hralh, zu siam leh zu inte khap a ni dawn a; dan bawhchhiate hremna tur dan hrang hrang a awm.

Bill pharhnaa thil tel Financial Memorandum-a a lan danin, The Mizoram Liquor (Prohibition) Bill, 2019 hi a taka hman a nih chuan, zu zawrh laia sorkarin chhiah a hmuh ṭhin cheng nuai 7,000 vel sorkarin a hloh dawn a ni.

House leader Zoram­thanga chuan, MLA inthlan dawnah sorkarna an siam chuan zu khap an intiam tih sawiin, "Sorkar apianga khap chíng leh sorkar apianga zawrh ching kan awm. Ka chhût dan chuan, zu zawrh hnuah a hun hmain mi 5,000-7,000 an thih pawh," a ti.

Zoramthanga chuan, zu zawrh hlâwk tite chu a aia hlâwk zawk SEDP hnuaiah an siamsak dawn tih sawiin, "Zu hi tirêm vek thei lo mah ila, thui tak kan chingfel ang," a ti a; zu khuahkhirh turin sorkarin theihtawp a chhuah tur thu a sawi.

ZPM Group leader Lalduhoma chuan, zu khapna dan chu an thláwp tih sawiin, "ZPM-in kan ngaih pawimawh em em sorkarin min veipui hi lawmawm kan ti," a ti a; issue base-a kal ṭhin an nih thu sawiin, "Zu khap chungchangah chuan sorkar thar kan thawhpui. Lok Sabha inthlanah chuan CAB duh loa theihtawp chhuah Congress kan thawhpui dawn," a ti bawk.

Speaker sawi danin, tun ṭum session-ah hian House-a chhan tur zawhna lut 139 zinga 135 pawm a ni a, 33 chhan hman niin, 42 chhan hman a ni lo a, a bak chu List of Business-ah dah a ni.

Paper 14 pharh a ni a, bill 14 lut zinga 13 pawm niin, pakhat chu siamṭhat tura tih a ni. Private member resolution pahnih pawm a ni a; ZPM member Vanlalhlana resolution 'United Nations Declaration of Right of Indigenous People 2007 hi a hlawhtlin nan India sorkarah na takin nawr ni rawh se’ tih leh, Lalrintluanga Sailo resolution - Aizawl laili aṭanga Assam Rifles an chhuah dawn vanga lawmthu sawina chu pawm a ni.

Speaker chuan, session tluang taka neih a ni chu lawmawm a tih thu a sawi a, "Buaina a awm lo a, khawvel mithmuhah a zahawm hle a, kan chhawm nun zel a ṭul dawn a ni," a ti a; tluang taka session a kal theihna tura thawktu zawng zawng chungah lawmthu a sawi.