Blood processing fee atan Finance-ah cheng nuai 200 dil

Health minister Dr R Lalthangliana chuan INC member Zodintluanga Ralte zawhna chhangin, financial year 2019-20 atan sorkarin thisen man atan sum dah a nei lo tih a sawi a; chutih rualin, kum 2019-20 chhunga blood processing fee atan Finance department-ah chegn nuai 200 dil a nih thu Assembly House a hrilh.

Dr R Lalthangliana chuan, Cabinet-in kumin January 10-ah blood processing fee tihtawp a rêl tih sawiin, "Kum 2019-20 budget estimate-ah cheng nuai 200 dah turin Finance-ah dil mek a ni a; thisen man ngawr ngawr ni loin, blood processing fee atan tih a ni. Financial year liam mai tur hun rei lote chhung atan cheng nuai 50 Finance-in min pe tawh a, thisen man ni loin, blood processing fee a ni," a ti.

Kum 2019-20 chhung atana blood processing fee atana Finance-a an dil cheng nuai 200 chu hmuhte ngei an beisei tih sawiin R Lalthangliana chuan, "Kan Chief Minister-in a ngai pawimawh a, Cabinet thutluklna hi chu sorkar hian a tihlawhtling turah kan beisei," a ti a; tunah blood processing fee tihtawp chuan private hospital-te a huam ve rih loh thu a sawi.

Zawhna neitu Zodintluanga Ralte chuan, sorkar term hmasaah sorkar hotute'n blood processing fee chu thisen man a ni lo an ti chungin, opposition MLA (MNF)-te'n 'Thisen man' tia an sawi luih tlat ṭhin thu a sawi a, "Tunah thisen man a ni lo e, an ti ve ta hi a lawmawm hle a ni," a ti.