CEO-in Synod puipate a kâwm

Chief electoral officer (CEO) Ashish Kundra chuan nimin khan Synod Office a tlawh a, Synod moderator Rev. R Lalhming­thanga leh Synod puipa dangte a kâwm.

CEO chuan, Synod hotute chu Mizoramin Lok Sabha inthlanpui a hmachhawn turah boruak muanawm leh rálmuang tak hnuaia mipuiin vote an thlak theih nan leh rilru ngaihtuahna fim tak hmanga vote thlak a nih theih nan thawhpuiah a sáwm a, "Mizorama inthlan boruak thianghlim leh rálmuang awm ṭhin chhan pakhat chu kohhran hruaitute'n an thlàwp ṭhat ṭhin vang a ni," a ti.

Ashish Kundra chuan, inthlana kohhrante hnathawh chu Election Commission of India pawhin a hriatpui tih sawiin, "Mizoram hi India ram hmun danga inthlan boruak nen a inang lo a, entawntlak hle a, hei hi chhawm nun zel a pawimawh," a ti a; kohhran hruaitu te, khawtlang hruaitute leh tlawmngai pawl hruaitute nen thawhhona ṭha tak an neih zel a beisei thu a sawi.