TDS vangin Joint NGO-in SBI an dang Mizoramah TDS kalpui a ni dawn lo

India sorkarin State Bank of India kaltlanga chhiah chi khat, Tax Deduction at Source (TDS) lak a tum duh loh lantir nan NGO Coordination Committee chuan nimin khan Mizoram pumah SBI office-te an dang a; nimin vek khan SBI aṭangin thu thar a awm avangin chhun dar 1-ah SBI dan chu an titawp.

Nimina SBI office hrang hrang dan tur chungchangah hian Central YMA chuan March 19, Thawhlehni zan khan Aizawla YMA branch hrang hrang aiawhte Vanapa Hall-ah an ko khawm a; TDS chungchang leh SBI danga duty dan turte an inhrilhfiah.

Aizawl leh khaw hrang hranga YMA branch member-te chuan nimin zing dar 8 vel aṭang khan SBI office-a thawkte pisa kai tur an dang ṭan a, mi ṭhahnem tak an thawk chhuak a; pisa kai luih tum vanga indan buaina a awm lo. SBI aṭangin thu thar a awm avangin Joint NGO chuan nimin chhun dar 1 khan SBI an dan chu tihtawp a nih thu an tarlang.

Joint NGO thuchhuah chuan, SBI-in Mizo tribal-te aṭanga TDS lak an tum, NGO Coordination Committee-in a duh loh vanga Mizoram chhunga SBI staff-te office kal tur a dan chu, SBI Deputy General Manager & CFO lehkha No. COMP/SK/2018-19 Dated 20th. March, 2019-in TDS la lo a, a hma anga kal leh an intiam avangin, 20.3.2019-a CYMA office Joint NGO meeting chuan SBI staff-te office kal tur a dan chu 20.3.2019 chawhnu dar 1 aṭangin thu leh awm hma chu tihtawp a ni e," a ti.

TDS chungchangah hian SBI regional manager Dibyendu Chaudhuri chuan NGO Coor­dination Committee Chairman hnenah lehkha a thawn. Lehkhaah chuan TDS lakna (cut) tura thil lo tihfel tawhte chu hnûk letin, lak loh tura thutlukna siam a nih thu a ziak a; chuvang chuan, Joint NGO-te chu SBI staff an dan titawp turin a ngen a ni.