CAB tharthawh leh duh lohna Assembly House-ah pass a ni

Nimina Assembly session-ah The Citizenship Amendment Bill (CAB), 2016 tharthawh leh duh lohna official resolution pass a ni. Chief minister Zoramthanga chuan, CAB pass luih a nih chuan an party-in NDA an chhuahsan dawn tih a sawi.

Resolution hi Home minister Lalchamliana put luh a ni a; resolution-ah chuan, 'That this House resolves to impress upon the Government of India its unequivocal opposition to the Citizenship Amendment Bill, 2019 already passed by the Lok Sabha that seeks to amend the Citizenship Act, 1955 to make illegal migrants eligible to be given Citizenship Act, 1955 to make illegal migrants eligible to be given Indian Citizenship on the basis of religion and that this House urge upon the Government of India not to re-introduce the bill in any form in future' tih a ni.

Lalchamliana chuan, CAB chu NGO, political party leh kohhrante pawhin an ngaimawh thu an sawi tih sawiin, "Chuti chung chuan Lok Sabha-ah pass a ni a, Rajya Sabha-ah pass ni phei se chuan dan a ni dawn. Sorkar hmasaah Cabinet leh Assembly House-ah CAB duh lohna pass a ni a, sorkar thar a pian hnuah pawh Cabinet-ah ṭum hnih pass a ni tawh. 8th. Assembly-ah hian duh lohna lantir ve ngei ni se tiin resolution hi ka pu lut a ni," a ti.

CM Zoramthanga chuan, CAB chungchang chu an ngaih pawimawh em avanga resolution pu lut an nia sawiin, "Vawi tam kan do tlang a, House-ah pawh CAB duh loh thu pass a ni tawh. House-a pass tawh si Chief Minister leh minister dangte'n ngati nge an ûm zui loh tih sawite kha a awm a, a âwm tho. A ngaihmawhawm em a ni," a ti a; Congress kaihhruai sorkarin CAB duh lohna pass mah se, a bawhzuina lamah an ngawi rei niin a sawi.

NDA leh NEDA-in danglamna a neih loh thu sawiin Zoramthanga chuan, "NDA leh NEDA hi thliar hran tum anga tihrik tum palh a hlauhawm, thuhmun reng a ni a, a danglamna a awm lo. Hmarchhaka awmte hi NEDA a ni a, sorkar laipuiah chuan NDA a ni. NDA branch-a dilna kum 2014 khan kan thehlut hlawm a, NDA branch kan nihnaah MNF, ZNP leh MPC aiawhin president ṭheuhin hming kan ziak a ni. Kha kha NDA kan nihna ber a ni a, a hranpaa zawm tharna kan nei chuang lo," a ti.
Chief Minister chuan, 'BJP thawhpui' tia inpuh kualna a awm reng thu sawiin, "Tu nge nge thawhpui tak tak leh tak loh chu a hriat vek. MLA bye-election-ahte khan tute nge thawhpui kan hre vek a, CADC-a BJP sorkarna siampuite pawh kan hre vek. Hnam hnufualte Kristiana inleh khapna dan pass a nih ṭumte kha Congress sorkar lai a ni a, kan missionary-te'n kha aia dan an buaipui nasat a awm lo," a ti a; MP inthlan turah CAB pass tumte thawhpui duh loin MNF chu a mal din niin a sawi.

ZPM Legislature Group leader Lalduhoma chuan, CAB chu hriat a nih velah ZNP anga hma an lak nghal thu sawiin, "Bill zir chiangtu Committee-ah lehkha kan ziak a, MPC President pawhin lehkha a thawn. Lok Sabha-a thehluh a nih laiin BJP leh a thawhpui ni lo zawngin an dodal a, khang ho hmalakna avangin Rajya Sabha-ah pass a ni lo. Resolution lo luh dan hi a lang reng a, Lok Sabha inthlan a hnai a, vote zawnna atana put luh a ni," a ti.

Lalduhoma chuan ṭan rual a pawi­mawh tih sawiin, "A issue azirin political party-te hi MP leh MLA in­thlanah kan indoin, kan thawkho fo. A hun azir zelin han inbei ṭhin mah ila, kan thawkho thei a, thawkho lo tak tak pawh kan awm tawh lo. NEDA hi kan zawm ve ṭhin a, kan zawm rei lo. BJP hidden agenda Hidutva leh thil dangte a lo lang ṭan a, hnaih chi an ni lo a, do chi an ni tih hriain kan chhuahsan a ni. Issue base-a thil kalpui a pawimawh," a ti a; MLA inthlana issue chu zu zawrh, etc. a ni a, MP inthlan­ah chuan CAB, TDS leh Uniform Civil Code-te issue a nih thu a sawi.

MP inthlanah BJP-te a mal chuan an sorkar dawn lo tih a chiang nia sawiin Lalduhoma chuan, "NDA-a an sangawi zawnpuite nen an sorkar lo ang tih a sawi theih loh. A ṭha ber chu MNF-te hian NEDA/NDA hi chhuahsan se. Kan hmaa inthlanah hi chuan Mizo Kristian kan nih chuan kan tih tur leh tih loh tur a chiang reng a ni," tiin, MNF chu NDA/NEDA chhuahsan turin a phût.

Congress Legislature Party leader Zodintluanga Ralte chuan, CAB ṭhat lohzia leh Mizo ram leh hnam tana a him lohzia hriat tlân a nih thu sawiin, "Sorkar hmasaah pawh CAB duh lohna House-ah pass a ni. Vawiina kan sor­kar ding laite hian CAB pass-tute BJP a sorkar theihna atana NDA-a an la telzia nasa taka an la sawi duh si chuan hetiang Bill hi pu lut tur an ni dawn em ni? BJP President chuan hman ni lawkah an sorkar chuan CAB an pass dawn thu a sawi a ni," a ti a; CAB pass duhtute sorkartir lo tura hmalak chu MNFpawhin an tih tur nia a hriat thu a sawi.