KHAWTHLIR

Result chhuak
Mizoram Public Service Commission (MPSC) chuan Mizoram Civil Services (Combined Competitive) Main Examination 2018 result nimin khan a tichhuak. Main exam hi November 5-9, 2018 chhung khan neih a ni a, personal interview (viva voce) turin mi 30 an tling a; interview chu kumin April 30 aṭanga May 2 chhungin neih a ni ang. Tun ṭum MPSC combined exam-ah hian MCS post 12 leh MFAS post pathum lak tur a ni.

Sak zawm thei lo
Tourism minister Robert Romawia Royte chuan ZPM member Andrew H Thangliana zawhna chhangin, Kawnpui Hmarvenga Tourism department-in guest house/tourist lodge tur a sak chu kum 2015-16 ah a sakna project scheme a tawp tawh avangin sak chhunzawm theih a ni lo tih Assembly House a hrilh.

SHC bial siam
March 8, 2019-a Councils of Minister ṭhukhawmin Sinlung Hills Council Act, 2018 Section-3 tlawhchhana a rêl angin, SHC huam chhunga constituency 12 tur tihfel a ni. SHC constituency hming turte chu - Khawlian, Phuaibuang, Suangpuilawn, Vanbawng, Ratu, New Vervek, Sakawrdai South, Sakawrdai North, Zo­hmun, Ṭinghmun, Saihmun leh Saiphai-te a ni.

Kawng siam dawn
Tlangnuam Vengthar­ah culvert siamṭhat hna thawh a nih dawn avangin vawiin aṭangin Tlangnuam-Saikhamakawn via Tlangnuam Vengthar kawngah lir­thei tlan phal a ni dawn lo. Hemi chungchanga Traffic SP thupek hian kawng siam hna thawh zawh hma zawng a huam dawn a; chhiatrupna thil kângmei leh rûkrum thila duty leh dan leh thupek pawimawh bika duty-te chêtvelna a huam lo.

Saitual an lawm
Saitual District Implementing Demand Committee chuan thu­chhuah siamin, Saitual district tihpuitlinna tura Mizoram budget-ah sum dah a ni ta chu lawmawm an tih thu leh Saitual bial mipui an lawm tak zet thu an tarlang a, "Pu Zoramthanga leh a kaihhruai sorkar chungah thinlung takin lawmthu kan sawi e," an ti. SDIDC hian nimin khan chief minister Zoramthanga leh bialtu MLA R Lalzirliana te hnenah chawimawina an hlan a ni.