Zirtirtu nei lo sorkar sikul 13 a awm mek

School Education minister Lal­chhandama Ralte chuan, zirtirtu indaih lohna a nasa tih sawiin, April thla tira sikul kum thar ṭan hunah pawh zirtirtu nei miah lo tur sikul 13 an awm thu a sawi a; zirtirtu lak thuai a nih theih nan, Lok Sabha inthlan vanga Model Code of Conduct hman lai pawhin, Mizoram bika inthlan zawh veleh zirtirtu lak phalsak turin Election Commission of India (ECI)-ah dilna thehluh an tum thu Assembly House a hrilh.

INC member Zodintluanga Ralte-in sorkar sikula zirtirtute sem rual hun tur chungchang a zawhna chhangin Lal­chhandama Ralte chuan, "Zirtirtu post ruak hi a theih ang anga hnawhkhah tum a ni a, hnawhkhah rual hian, zirtirtu indaih lo leh siam rem ngaite chu a tah tawla siam rem zel tum a ni," a ti.

Zawh belhnate chhangin Minister chuan, zirtirtu sem rual a nih theih nan hma an la nghal char char nia sawiin, "Sorkar hmasa kum 10 khan zirtirtu min hnutchhiah hi a inkhuangrual lo em em mai a, zirtirtu an pension zel a, tunah pawh April thlaa sikul ṭan turah zirtirtu nei miah lo sikul 13 lai a awm a ni," a ti a; MLA inthlanpui hmaa zirtirtu transfer theih laiin mahni bial lamah tam tak an transfer avangin harsatna a tam phah niin a sawi.

School Education Minister chuan, zirtirtu lak belh viau loh chuan zirtirtu sem rual tak tak turin tuna zirtirtu awm laite'n an daih tawh lo tih a sawi a, "Ram pum huapin sikul pakhatah zirtirtu pathum pawhin kan indaih tawh mang lo... April thlaa sikul ṭan turah pawh bul ṭanna turin a bul hnai khuaa zirtirtute lo hmui mai turin kan ti hial. Rei lo têah hian kan sem rual thei ang," a ti.

Zirtirtu transfer dawna bialtu MLA-te remtihna lehkha a ngai tih chung­changah Minister chuan, a lo sawi tawh angin bialtu MLA-te a theih ang anga an râwn thu a sawi a, "Transfer duh an tam khawp mai a. Bialtu MLA-te kan biaktir a, opposition MLA-te pawh kan biaktir tho a, an hnen aṭangin lehkhate an rawn la a ni," a ti a; dinhmun azira transfer ngei ngaite pawh an awm thu a sawi.

Lalchhandama ralte chuan, "Education bik hi a ṭha thei ang bera tih kan duh avang­in inthliarna poltitics thil awm loa kalpui a theih chin chinah kan tum, ruling opposition-te nen ṭangruala kan tihho ṭul ka tih avangin opposition MLA pawh ni se, ràwn tel zel turin thurâwn ka lo pe ṭhin," a ti.

Educaton Minister sawi danin, Right to Education (RTE) ang chuan zirtirtu pakhatin zirlai 30 an enkawl tur a ni a, Mizoram pumpui chawhrualin zirtirtu pakhatin naupang 12 enkawl ang an ni. RTE ang chuan zirtirtu pali awmnaah zirlai 120 an awm a ngai a, mahse, Mizoramah chuan khaw tê tak tak, zirlai 20-30 lek awmnaah pawh class indaih zirtirtu indah tho a ngai a, chuvang chuan RTE norms anga kal theih a ni lo.

Dr Vanlalthlana zawhna a chhannaah Education Minister chuan, zirtirtu post ruak 2,300 chuang a awm mek thu sawiin, zirtirtu mamawhna a san em avangin muster roll-in zirtirtu lak an tum thu a sawi a, "Thil tih zung zung a harsa a, DPAR leh Finance phalna lak a ngai a, buaipui mek a ni," a ti a; sikul ṭan hmaa zirtirtu lak hman duh mah se, Model Code of Conduct vangin an lak theih rih loh thu a sawi.

Minister chuan, mamawhna a san avang leh hmanhmawhthlak tawh avangin Model Code of Conduct hman la ni reng mah se, Mizorama inthlan vote thlak zawh veleh zirtirtu lak phalsak turin ECI-ah dil an tum thu a sawi a, "Zirtirtu lak turah hian a theih chin chin­ah a khaw mite duhsak an ni ang," a ti.