Mipuite aiawh tura pên chhuak ka ni - Lalnghinglova Hmar

Lok Sabha MP inthlan awm tura Congress party leh ZPM-in mipui candidate atana an chhawp chhuah Lalnghinglova Hmar chuan, Mizo mipui aiawh tura pên chhuak a nih thu a sawi.

Lalnghinglova Hmar hian nimin khan Kolasib Press Club-ah thuthar thehdarhtute a kâwm a; Congress aiawh emaw, ZPM aiawh emaw tura MP atana ding chhuak a nih loh thu sawiin, "Mizoram mipui aiawha hmasawnna thlen tura pên chhuak ka nih ang ngeiin, thawhpui theih loh ka nei dawn lo. MP ngawi reng ni turin ka inpe lo a, ram tan ka inpe a ni," a ti.

Party behchhana ding ni lo mah se, thlan tlin a nih chuan MNF sor­karin Mizoram tana a hmalaknate a hlawhtlin theihna atan Central-ah theihtawp chhuahpui a inhuam tur thu sawiin Lalnghinglova chuan, "Thawhpui theih loh ka nei lo. Chutih rual erawh chuan BJP lo lama ṭang ka ni a, NDA thláwpin bán ka phar thei lo ang," a ti a; ram leh hnam tana a theihna zawng zawng hlan a tum thu a sawi.

Lalnghinglova Hmar chuan, a chhinchhiahna - kil thum nei (triangle) chungchang sawifiahin, "I ram, i hnam leh i sakhua humhalh rawh tihna a ni," a ti a; Mizoram mipuite chu sakhaw zalenna atan leh ram hmasawnna atan amah vote turin a sáwm.

Lalnghinglova Hmar hi nikuma MLA inthlanpuia Kolasib biala Congress candidate Dr Ngurding­liana, ZPM candidate Lalfamkima leh Serlui biala Congress candidate Lalhmachhuana leh ZPM candidate Lalmuanpuia Punte ten an ṭawiawm a ni.