Resolution chungchangah ngaihdan inang lo

Nimina Mizoram Legis­lative Assembly session-ah Citizenship (Amendment) Bill (CAB) dodalna resolution pass a nih chungchangah politica party-te ngaihdan a inang lo a, thuchhuah hmangin an ngaihdan an puang. MNF ṭhalaite'n lawmawm an tih thu an tarlan laiin, Congress party leh ZPM-te chuan mipui bum tumnaa an ngaih thu an tarlang.

MNYF chuan, Home minister Lalchamliana'n CAB duh lohna leh dodalna official resolution a pu lut leh pass a ni chu lawmawm an tih thu sawiin, "Kan ram, hnam leh sakhua himna atana ding ṭhin MNF sorkar hi party ṭhenkhatin dâwt tinrengin bei ṭhin mah se, ram leh hnam tana ding a nihzia a lang chiang hleah kan ngai," an ti.

MPCC & ZPM Joint Publicity Committee chuan, CAB dodalna official resolution chung­changah, "NEDA hnuaia BJP thawhpui tlattu MNF sorkarin CAB dodalna resolution an pu lut leh lawi si hi thil awmze nei lo, MP inthlan lo awm tura Mizo mipui bum tumna hmaikáwr dik tak a ni," an ti.

MPCC & ZPM chuan, "MNF hian CAB an duh lo tak tak a nih chuan, CAB kaltlangpui tumtu BJP lama ṭang reng lo leh sorkartir tum reng lo hian BJP an thawhpuina hi an titawp ngei tur a ni," an ti a; CAB kaltlangpui tumtu BJP an sorkar loh nan BJP leh BJP thláwp tlattu MNF-te chu MP inthlan turah Mizoram mipuiin an hnâwl ngei a ngaih thu an sawi.