Sorkarin Kolasib DIET a chhui chiang mek

School Education minister Lalchhandama Ralte chuan Dr Vanlalthlanna zawhna chhangin, kum 2012-2018 chhunga Kolasib DIET hnuaia training hrang hranga zirtirtu pension leh thi tawhte hminga training attencance sheet-a signature awm leh TA/DA lak anga lang chu chhui chian mek a ni a, DIET Principal aṭangin sawifiahna sorkarin a dawn tawh thu House a hrilh.

ZPM member Dr Vanlalthlanna chuan, Kolasib DIET leh DIET dang chungchangah document a neih thu sawiin, "Pension tawh, thi tawhte pawh an la training ṭang ṭang a ni a, thil dik lo titu kha transfer tum a ni tih chauh a ni a, khatiang lek action kha chu a tawng dawn em ni?" a ti.

Dr Vanlalthlana chuan, kum 2013-14 ah 'Training of RTE for PS Teacher under Ngopa Circle' tih chu May 13-17, 2013 chhung­in neih a ni tih sawiin, "Zirtirtu training zawng zawng hi an sawn chhuak vek a nih loh chuan, an pension ta dial a ni ang, School Education website-a zirtirtu list-ah an hming a lang miah lo," a ti a; Champhai DIET-ah hming lem an hmang ṭhin nia a lan thu te, training hall-ah mi 40-50 vel an len laiin mi 77 training anga ziah a nih thu te, DIET dangahte pawh thil felhlel a awm a, attendence sheet-a signature inang hlir a awm tlar duat thute a sawi.

School Education Minister chuan, Kolasib DIET chungchang chu vanduairthlak an tih thu sawiin, kum hmasa lamah pawh thâwm lo awm tawh ṭhin a nih avangin a hmunah an lo enfiah tawh ṭhin tih a sawi a, "Department-in theihtawp chhuahin hma kan la. Sorkarin kalphung a nei a, proceeding draw dante a awm. Principal hnenah show cause notice-te nen engkim sawifiah turin tih a ni a, ani pawhin chhanna a rawn nei tawh. Chhanna chu kan zir chiang mek a ni," a ti.

DIET-a thil dik lo awm nia sawi chungchangah ACB-ah FIR thehluh nia an hriat thu sawiin Lalchhandama Ralte chuan, "Keini pawhin thil dik lote chhui chhuah a nih a, hrem ṭul angte hrem an nih theih nan, dan anga dikna hai chhuah a nih theihna turin Principal kha kan sawn phawt a ṭul kan ti a, SCERT-ah attachment order kan tichhuak phawt a ni," a ti a; transfer chu justice a awm theihna tura sorkar action lakna a nih thu a sawi.

ACB-a FIR thehluh a nih chung­changah department-in beng an chhi reng tih sawiin Minister chuan, "ACB-in Chief Vigilance Officer (Chief Secretary)-ah chhui phalna an dil a, CVO-in chhui phalna a la pe lo. Keini chuan chu chu kan nghak a ni," a ti. Felfai taka dan ang taka tih a nih theih nan leh hrem ngai hrem an nih theihna turin ṭan an la tih sawiin, "Dikna kenkawh tumin he sorkar hian hma a la mek a ni... DIET dangte pawh kan en zui zel dawn," a ti bawk.