Kristiante nêkchêpna reng reng Ka dodal dawn - C Lalrosanga

Lok Sabha inthlanpui awm tura MNF candidate C Lalrosanga chuan, Kristianna nêkchêpna reng reng dodal a tum thu, nimina Kolasib Press Club-a thuthar thehdarhtute a kawmnaah a sawi.

C Lalrosanga chuan, MNF chu 'Pathian leh kan ram tan' titu party a nih avangin MP candidate atana an sawmna a pawm tih a sawi a, "Ram mamawh avangin politics-ah zuan luh a ṭul a ni. Mizoramah sorkar ṭha tak a piang a, Delhi lama an hmalaknate bawhzuitu an awm a ngai a, chumi atan chuan hna ka lo thawh tawhna avangin experience ka nei a ni," a ti.

MNF candidate chuan, MNF party candidate a ni thei chu lawmawm a tih thu sawiin, "Nationalism kengtu leh chu meichher chhitute zingah ka tel avangin ka lawm hle. Rei lote chhunga sorkar thar hmalakna leh hnathawhte ka hmuhin a ropui ka ti," a ti a; Mizoram sorkar hmalak dan chu ngaihṭhatthlak a tih thu a sawi.

C Lalrosanga chuan, "Ramri fel lo chungchangah MP-in a tih theih tawk tih ka tum. CAB chungchangah chuan a dodal zawngin bán ka phar ang. Ka kum tam mah se, tawnhriat ka ngah a, chu chuan ram leh hnam tana hna thawhna turah min pui dawn a ni," a ti.