Dâwt hmangin ka khingpuite bei ve suh u - Lalnghinglova Hmar

Lok Sabha inthlanpuia Congress leh ZPM-in an thlâwp mipui candidate Lalnghinglova Hmar chuan, dâwt leh thu dik hrûla a khingpuite bei ve lo turin amah ṭantu mipuite leh amah thláwptu party mi leh sate a chah.

Lalnghinglova Hmar hian nimin khan Kolasib bial leh Hachhek bial khaw hrang hrang a tlawhnaah thu sawiin, "Inthlan a hnai a, ṭan a na telh telh a, tlin tumin candidate-te'n theihtawp kan chhuah tlang a ni. Social media-ahte dâwt leh thu dik hrûl hmanga beihna ka tâwk mek a, ka tâwk zelin ka ring. Hetiang beihna ka tawh chhan hi tute emaw ṭan ulh luat vangah ka ngai a, ka dem lo," a ti.

Amah ṭantu mipuite leh party mi leh sate chu candidate dangte dâwt leh thu dik hrûla bei ve lo tura chahin Tetea Hmar chuan, "Ka khingpui turte hi mi fel tak tak an ni. Kei chuan din chhan ka nei a, chu chu kan ram, kan hnam, kan sakhua humhalh leh humhim a ni a, hei hi ka aupui zel dawn," a ti a; politics a nih vanga dâwt leh thu dik tâwk loa inbeih chu a pawm zawng a nih loh thu a sawi.

Tun ṭuma MP inthlan tur chu zu zawrh leh zawrh loh lam a ni lo tih sawiin Lalnghinglova chuan, "State-ah kan inthlang a, MNF-in sorkarna an chang tawh a, zu zawrh tihtawpna tur bill pawh House-ah an pu lut a, pass a ni tawh. MP-ah hi chuan tu pawh tling se, zu zawrh a ni dawn tawh lo. Parliament House-ah Mizoramin zu a zawrh leh zawrh loh chungchang ngaihtuah a ni dawn lo," a ti.

Lalnghinglova Hmar chuan, hnam dang ṭhalaite tih theih chu Mizo ṭhalaite pawhin an ti ve thei tih lantir a duh tih sawiin, "Central India lam chu sawi loh, hmarchhak ṭhalaite zingah pawh kum 40 an tlin hmaa MP leh minister hial ni thei an awm. Mizo ṭhalai, fing leh fel zawk zingah pawh an awm ang, a bul ṭantu ni turin ka pên chhuak a ni," a ti a; hnam dangte tih theih Mizo ṭhalaite'n an tih theih lohna chhan tur a hriat loh thu a sawi.

Lok Sabha inthlan turah ruling party ni sa an awm lo tih sawiin Tetea Hmar chuan, "MLA inthlan chu a dang daih a, MNF an sorkar tawh. MP inthlan turah hi chuan ruling ni sa an awm lo a, ruling tur kan thlang dawn. Kan ram, kan hnam leh sakhua himna atan Central-ah BJP an sorkar loh a ngai a, chumi tur chuan an thawhpuite pawh an tlin loh a ngai. Kei chu BJP do zawnga bán phar tura ding ka ni," a ti.

Lalnghinglova Hmar chuan, Lok Sabha MP-in a tih tur leh tih theihte ngun taka a zir chian thu sawiin, "Kawng hrang hrangin MP-te hian Mizoram hmasawnna atan an thawk thei a, chumi tihhlawhtling tur chuan ka pên chhuak ni," a ti a; thlan tlin a nih chuan infiamna khawvelah pawh tun aia hlâwk zawka a thawh theih tur thu a sawi a ni.