Vote chauh ka zawng lo, hnam hmangaiha Pên chhuahpui tur ka zawng - C Lalrosanga

Lok Sabha inthlanpuia MNF candidate C Lalrosanga chuan nimin khan Mamit district-a khaw hrang hrang a fang a, MP a nih chuan ram hmasawnna kawngah a ṭangkai thei ang bera thawh a tum thu sawiin, "Vote chauh ka zawng lo, hnam hmangaiha pên chhuahpui tur ka zawng a ni," a ti.

C Lalrosanga hian Mamit dis­trict-a khaw hrang hrang - Chuhvel, Saikhawthlir, Zamuang, Zawlnuam, Bungṭhuam, Kanhmun, Rengdil, Kawr­thah, Tuidam, Darlak leh Mamit-te a tlawh a; vantlang inkhawma thu a sawinaah, "Central scheme tam tak awmte hai chhuah kawngah Mizoram sorkar pawh nasa takin ka puih theih ka ring," a ti a, Mizorama sorkar lai nena inngheng riala hma laho thei MP Mizoramin a neih a pawimawh niin a sawi.

MNF Candidate chuan, Pathian leh mipui zarah thlan tlin a nih chuan Citizenship (Amendment) Bill 2016 do zawngin Parliament-ah vote a thlak dawn tih a sawi a; MP a nih chuan ram hmasawnna kawngah a ṭangkai thei ang bera thawh a tum tih sawiin, "Ka hnathawhna avangin hmarchhak leh India ram hmun hrang hrang ka tlawh ve tawh ṭhin a, rualawh a na fo. MP ka nih chuan kawng ṭha zawk kan neih zel theih nan te, inbiakpawhna lama hma kan sawn theihna tur te, kawlphetha ṭha zawk kan neih theihna turtein nasa takin sorkar ka puih theih ka ring," a ti.

C Lalrosanga chuan, ṭha­laite'n an talent hrang hrang sport, music leh thil dangtea ei an zawn theihna tur kawng dapsak a tum thu a sawi bawk.