KHAWTHLIR

Thisen pe
Khatla South Branch KṬP chuan nimin khan an Kohhran Hall-ah blood donation camp an huaihawt a, Synod Hospital tan thisen unit 47 an pe a, a petute mipa 38 leh hmeichhia pakua an ni.

Lawm dawn
Chanmari Branch KṬP chuan naktuk Inrinni hian an Branch kum 60 tlin, diamond jubilee lawmna pui ber an hmang dawn a, an Branch-a member lo ni tawh zawng zawngte tel turin an sáwm. Chawhma dar 11-ah inkhawm a awm dawn a, tlaiah ruai ṭheh a ni ang.

Lehkhabu tlangzarh
Mizoram Psychological Association buatsaih 'Psychology Mitin Tan' tih chu nimin khan Govt. Aizawl College-ah Health secretary H Lalengmawia'n a tlangzarh. Lehkhabuah hian mihring nuna in enkawlna tur leh rilru hrisel theih dan tur tarlan a ni.

Tlân theih loh
SIPMIU, Aizawlin naktuk Inrinni aṭangin Chanmari West Kawipui leh Vaivakawna Hunthar Veng pêng inkar kawngpuiah tui pipe lian an phûm dawn a, hei vang hian hna thawh laiin lirthei tlan phal a ni dawn lo tih Traffic SP-in a tarlang. Hna thawhna huam chhunga chengte erawh chu hna thawh dinhmun azirin hriatthiam an ni dawn a; hnathawh tibuai thei turin kawng sirah lirthei dah phal a ni lo. Thupek hian hna thawh zawh a nih hma zawng a huam ang.

EVM dah tha
April 11, 2019-a Lok Sabha inthlanpui awm tura Champhai district-a hman tur electronic voting machine (EVM) leh voter verifiable paper audit trail (VVPAT)-te chu nimin khan constituency hrang hrangah sem a ni a, constituency tina strong room-ah dahṭhat nghal a ni.

Skill training
Lunglei District KVK chuan nimin aṭang khan Lungleia AMFU pisaah ni thum awh tur Skill Training on Rural Youth an buatsaih a, Lunglei district MJA president H Lalthansanga'n a hmanpui. Training-ah hian ar vulh, thlai thar sawngbawl dan leh dahṭhat dante ni hnih chhung a thuin an zir dawn a, a ni thumnaah a taka tihpui an ni ang.