Inkhârkhip hnuah damdawi-inah OPD leh Casualty pantu an tlem

Aizawl Civil Hos pital (ACH) medical superintendent Dr Lalhmuchhuaka chuan, Covid-19 laka invenna atana inkhârkhip (lockd own) kalpui a nih hnuah ACHah out patient department (OPD) pantu leh rîkrum thil (emergency)-a casualty pantu zat a tlakhniam thu a sawi. Vanglaini palai zawhna chhangin Dr Lalhmuchhuaka chuan, tun dinhmuna OPD pantu chu inkharkhip hmaa pantu zatve aia tlem daih a nih thu sawiin, "Emergency case chu a chanve dawnin a tlahniam.

Emergency case tam chhan ber pakhat lirthei chetsualna a thleng tlem. Case a tlem avangin thisen mamawh pawh nasa takin a tlahniam a ni," a ti. Dr Lalhmuchhuaka chuan, loh theih loh a nih loh chuan OPD pan lo turin mipui an ngen tih sawiin, "In lamah doctor râwn chunga inenkawl hram hram a pawimawh. Mamawh ngawih ngawihte tan chuan OPD hawn a ni tho. Covid-19 symptom kaihhnawih natna neite chuan ZMC pan tur a ni," a ti a; inzai ngai pawh loh theih lohte chauh zai rih a nih thu a sawi. Damdawi-in leh a chhehvel chu damdawi hmanga phuh chhuah vek tawh a nih thu sawiin Medical Superintendent chuan, "Ward-ah a theih angin kut silna dah a ni a, dah theih lohna hmunah pawh hand sanitizer dah a ni.

Thawktu zawng zawngte theihtawp chhuah turin kan infuih reng a, mipuite thlaphang lo turin kan duh," a ti. Dr Lalhmuchhuaka chuan, Health Minister, Health secretariat leh directorate-te'n ruahmanna an siamsak zawng zawngah an lawm thu sawiin, "A nacháng kan hriat lohte pawh min fi nchhuah a ni," a ti a; ACH chuan mipui tan theihtawp an chhuah zel tur thu a sawi.