MNF-in BJP kan la thawhpui lo - Zorama

MNF party chuan nimin khan April 11-a Aizawl West-I Assembly bye-election neih tura campaign kick-off, Chawlhhmun Community Hall-ah an hmang a; thusawitu Zoramthanga, MNF president chuan, inthlanah MNF-in BJP an la thawhpui lo a, BJP thawhpuitu chu Congress leh ZPM-te an ni zawk niin a sawi.

Zoramthanga chuan, tun ṭum MP inthlan leh bye-election chu khawvar hnua inthlang tur an nih thu sawiin, "Ruling MP leh MLA kan thlan tlin ngei a ngai. Kan MP candidate C Lalrosanga hi radio-ah pawh director general thleng pha, Pathian ṭih mi leh mithiam tak a ni a, bye-election-a candidate Zothan­tluanga lah mi ṭha tak a ni. Mihring an ni a, tlin lohna lai nei ve ve an ni ang, chu'ngte chu theihnghilhin, lo thlang tling ngei ngei ang che u," a ti.

An candidate-te chu an ṭha dun hle tih sawiin Zorama chuan, "Beihna an hriat loh avangin policy matter-ah min bei a, BJP nena thawk dûnah min puh a, CAB-ah min bei a, NDA leh NEDA-a telah min puh a ni," a ti a; Congress duh loh vangin MNF, ZNP, MPC, BJP leh MDF president ṭheuhte'n NDA zawmna lehkha an ziak niin a sawi.

Zoramthanga chuan, zu chu Congress túr hlauhawm a nia sawiin, "Zu vanga thi police ringawt 500 chuang an ni a, rál kuta thi an awm lo. Civil mi 5,000 - 7,000 inkar an thi tawh. Fahrah leh hmeithai siamna khawl buntu thawhpui leh tlat si Pu Duhoma te hi lehlam hawiin an nui tawi vel mai mai a ni," a ti. Aizawl North-III biala bye-election neih tawhah Lalduhoma chuan BJP a thawhpui tawh tih sawiin, "CADC sorkar siam nan Congress-in BJP an thawhpui bawk. MNF chuan vawi khatmah BJP kan la thawhpui lo," a ti.

Chief minister Zoramthanga chuan, "Kan sorkar tirhah Assam Riffles-ho May 2019 thla ral hmaa chhuak turin order kan siam nghal a, Central lamin football stadium paruk min pek an tum nghal. Cheng vaibelchhe tam tak kan sawi chhuak nghal a ni," a ti a; Delhi-ah eng pawh sorkar se, Zoram malsawmna an hai lut dawn niin a sawi.

Bye-election-a MNF candidate Zothantluanga pawhin thu sawiin, Aizawl West-I mipuite chu duh thlang sual lo turin Pathianin hun a pe tih a sawi a, "He bialah hian hmasawnna tur tam tak a la awm a, higher secondary pakhat pawh kan la nei lo. Tui chung­chang leh thil dang tam tak thawh tur a tam. He sorkar hnuaia an thawhpui member neih ve hi West-I mipui mawhphurhna a ni," a ti.