PYD Day vawi 50-na lawm a ni

Nimin March 21 kha UPC (North East India) hnuaia ṭhalai pawl, Pentecostal Youth Department din champha, PYD Day vawi 50-na a ni a, Mizoram hmun hrang hrang bakah, India hmarchhak hmun dangahte hman a ni.

PYD Day hmangtu PYD local tam zawk chuan zing karah an awmna venga tuihâwk luankawr, vantlang zun-in, inthiarna leh khawlai thenfai hnatlang an nei a, chhun lamah thisen pe. Damlo leh awmpuitute tana ei tur sem leh bial huapa intihhlimna leh infuih tharna hun hmang eng emaw zat an awm bawk.

Kum 1969 khan Foreign Mission Division phalnain UPC-ah unit hran, NE India Unit din a ni a; UPC NEI Unit Executive Board meeting hmasa ber March 21, 1969-a neih chuan ṭhalai pawl, Pentecostal Youth Department a din a ni. PYD general president hmasa ber chu Rev. KL Hnuna a ni a, general secretary leh treasurer hmasa ber chu Rev. K Satinvela a ni.

PYD (NEI)-ah hian tualchhung kohhran 533-ah member 22,058 an awm mek a, kumpuan thupui an hman mek chu 'Intodelh' tih a ni.