Issue lian tak avangin ZPM leh Congress kan thawkho - Duhoma

Congress party leh ZPM chuan April 11-a inthlan tur pualin nimin khan Ramrikawn, Aizawl­ah vantlang inkhawm an buatsaih. ZPM leader Lal­duhoma, MLA chuan, a hun lai leh issue azir zelin thawhhona a awm ṭhin tih sawiin, kumin MP leh MLA bye-election-ah pawh issue lian tak avang­in ZPM leh Congress party an thawkho tih a sawi.

Lalduhoma chuan, Mizoram state a nih hnuah MP leh MLA election-ah party hrang hrang ṭum 10 an thawkho tawh tih sawiin, "MP election-ah hian opposition party-te kan thawkho ṭhin a, a hun lai leh issue azir zelin thawhhona a awm ṭhin. Kumin MP election leh MLA bye-election-ah hian zu zawrh leh zawrh loh te, sem policy-te hi kan issue a ni tawh lo a, Mizorama sorkarna siam tur zawnna kan nei dawn hek lo. India ramah tu nge sorkar ang, tu nge sorkar se kan duh tih kan bûk dawn a ni," a ti.

Lok Sabha inthlana Mizoram tana issue lian ber chu Citizenship (Amendment) Bill (CAB) a ni tih sawiin Duhoma chuan, "Tunah chuan CAB pass tumtu, Uniform Civil Code chhawpchhuah tumtu, Hindutva chawisan tumtu, kohhran leh NGO-te pawhin kan duh loh em em, Kristiante nêkchep tumtu BJP leh a sangawi zawnpui MNF-te leh a dodaltute kan inhmachhawn a ni," a ti a; tuna pawimawh ber chu BJP, NDA leh Mizorama an thawhpui MNF-te paihthlak a nih thu a sawi.

Lalduhoma chuan, ZPM leh Congress party chu ṭangho lo ta se, NDA member MNF candidate-te an tling mai thei tih sawiin, "An tling a nih chuan BJP kaihhruai NDA a sorkar leh hi an thil tum a nih si avangin, anni hi kan paihthlak ngei ngei a ngai a, chuvang chuan, kan ram, kan hnam leh kan Kristianna himna turin kan thawhho a lo ngai ta a ni," a ti. Mizoram mipui­te chu Congress-ZPM mipui candidate Lal­nghinglova Hmar vote tur leh, Aizawl West-I mipui­te chu Lalbuanga Sailo vote turin a sáwm a ni.

Aizawl West-I bye-election atana an candidate Lalbuanga Sailo pawhin thu sawiin, tuna inthlan awm tur chu silai tel loa CAB duh lotute leh pass tum ṭâlhtute indona a nih thu a sawi. MNF chuan MLA 26 an neih sa tawh avangin MLA dang pakhat neih leh an mamawh belh lo tih sawiin, "Opposition party ṭha leh chak, sorkar na taka khalh ngil thei tur neih belh hi kan ramin a mamawh zawk a ni," a ti.