ZMC-ah Covid-19 test ṭan

Zoram Medical College-a Covid-19 Testing Laboratory siam thar chu nimin chawhma khan a takin hman ṭan a ni. Laboratory hman hmasak berah hian mi 15-te nasopharyngeal swab endik a ni.

Nimina sample test-te chu - ZMC/ State Referral Hospital-a Covid-19 vei awm mek enkawltu doctor leh nurse mi 14-te leh Covid-19 kai palh theih vanga ZMC low risk ward-a damlo pakhat enkawl mekte an ni a; nizan khan mi 11 result hriat hman niin, Covid-19 an kai lo vek tih fi nfi ah a ni. Mi pali dangte sample chu vawiinah endik leh a ni ang.

Health minister Dr R Lalthangliana chuan nimin khan thuchah tichhuakin, Covid-19 Sample Testing Laboratory hman theih a nih tawh avangin sample test tur Silchar-ah thawn a ngaih tawh dawn loh thu a sawi a, "Test kit 1,000 kan nei tawh," a ti. Dr R Lalthangliana chuan, "Duhthu samin famkim lo mah se, sorkar hmasain medical college an lo din kha a lawmawm tak zet. Kan sorkar hnuah kan tichangtlung a, laboratory kan nei thei ta a ni," a ti a; laboratory din a nih theihna atana hma latu Core Committee-te hmalakna chhuanawm a tih thu a sawi.

Health Minister chuan, boruakin a zir loh avangin laboratory hawnna hun buatsaih theih a ni lo tih sawiin, "Mizoram Kohhran Hruaitu Committee-te laboratory leh thawktute Pathian hnena hlân turin ka ngen a ni," a ti.