MKHC-in inthlan thuchah an tichhuak

Mizoram Kohhran Hruaitute Committee (MKHC) chuan nimin khan inthlan thuchah an tichhuak a; April 11, 2019-a Lok Sabha inthlanpui leh Aizawl West-I Assembly bye-election puala ṭawngṭai turin kohhran tin an ngen bakah, Mizo ram, hnam leh sakhaw himna ngai pawimawh tur mi thlan chhuah tum turin mipui an chah.

MKHC chuan, "He kan thuchah siam hi Mizoram mipui, kohhran leh political party-te'n ngai pawimawh a, lo zâwm hrâm turin Pathian hmingin kan ngen a ni," an ti a; inthlan tluang taka kan neih a nih theih nan leh Mizoramin aiawhtu ṭha a neih theih nan April 5/6, 2019-a kohhran inkhawmah tualchhung kohhran tinte ṭawngṭai ṭheuh turin an ngen a ni.

MKHC thuchah point dangte
A. MIPUI LEH PARTY-TE TAN
1. Zalên tak leh duh thlanna dik hmanga mi tinin vote an thlak theih nan, hel pawl leh ralthuam lam chi hman te, invau te, inbum te, sum semte tih loh ni se.
2. Hnam bil zawng te, khawtlang inpumkhatna leh kohhran inunauna tichhe zawngtein eng páwl mahin hmalak loh ni se.
3. Mimal leh pawl insawichhiat vak vak te, tharum thawhna chawk tho zawnga inelsèn leh inauh nawmnahte tih loh ni se.
4. Therhlo leh sum ûmin tumahin vote hralh loh ni se.
5. Kan ram, kan hnam leh sakhaw himna ngai pawimawh tur mi thlan chhuah theih ni se.

B. THLANTLINTE CHUNGCHANG
1. Thlan tlin apiang chu MKHC chuan a mawhphurhna ṭha taka hlen chhuak turin duhsakna kan hlan. Thlangtu mipui leh roreltua ruattu Pathian zah chungin ram leh hnam tan hna thawk tur leh party aiawh chauh an ni tawh lo a, Mizoram mipui zawng zawng aiawha ding a nih inhre reng turin kan duh. Kan ram, kan hnam leh sakhaw himna ngai pawimawh reng turin kan beisei a ni. Kohhran leh páwl duhsak bik nei lo a, ang khata an thu leh hla ngaih pawimawhsak tur leh kohhrante thawhpui theiha an awm kan duh bawk.
2. Thlangtu mipuite pawhin thlan tlin apiang chu kan ram tana Pathian min pekah pawmin, sawisel ringawt loin i ṭawiawm tlat ang u.