Congress chawh pherh bâng nâwi kan hman danah mipui an lungawi - Zorama

Chief minister Zoramthanga chuan, "Congress chawh pherh bâng nâwi kan hman danah mipui an lungawi a ni," a ti a; Lok Sabha inthlan leh Assembly bye-election-ah an chak ngei dawn niin a sawi.

Nimina Mizo Hnam Rûna inkhawmah thu sawiin Zoramthanga chuan, "MP leh bye-election-ah hian Pathian leh mipui zarah kan chak ngei ang. Inthlan dawna Congress sum chawh pherh bâng nâwi ringawt kan hman danah pawh mipui an lungawiin ka hria. Zoram mipuite hian keimahni chaw chhum ngei kan hlui hun beiseina sang tak nen an thlir mek a ni," a ti.

MNF President chuan, Congress leh ZPM thawhona chungchang sawiin, "Mi tam tak thih phahna Congress party sorkar zu zawrh chhan kha zawt ta ila, 'Tuna ZPM puipa ni tate min fuih vanga zuar kan ni alawm. Seminar-ah te, talkshow-ahte zu zawrh an sawi mawi a, lehkhabu hial an ziak a, min hmin ta alawm' ti thei an ni," a ti a; tunah chuan zu zawrh duh ve ve an thawkho ta nia sawiin, ZPM hotute'n 'Principle-ah kan ding' an ti ngam tawh lo niin a sawi.

MNF chu BJP nena thawk dunah eptu lamin an puh mek tih sawiin Zoramthanga chuan, "NEDA leh NDA hi thuhmun reng a ni a, Congress duh lo zawng kan ṭanhona pawl a ni. Kum 2014 MP thlan dawn July 26 khan 'Keini NDA branch chuan' tiin prime minister hnenah NLUP hman dik loh thu kan thlen a, lehkhaah ZNP president Pu Lalduhawma, MPC president Pu Lalhma­ngaiha leh MDF president Pu PP Thawlla ten hming kan ziak a ni," a ti.

Zoramthanga chuan, Citizenship (Amendment) Bill dona kawngah MNF-in hma a la nasa hle nia sawiin, "Cabinet-ah CAB duh lohna kan pass a, tun Assembly session-ah sorkar resolution-ah kan pass leh bawk a. Luhlul chhuaha sorkarin kan do lo nia sawi tam a, mipui awihtir an tum a ni," a ti bawk.