KHAWTHLIR

Thisen pe
UPC(NEI)-a Penticostal Youth Department din champha, PYD Day vawi 50-na lawm nan PYD Aizawl Bazar Bial chuan Aizawl Civil Hospital-ah thisen unit 36 an pe a, a petute mipa 28 leh hmeichhia pariat an ni.

Kawng siam dawn
PWD chuan Bazar Bungkawn leh Sakawrpului (Chhinga Veng leh Electric Veng inrina) inkar kawng an siamṭha dawn a, hei vang hian March 24 leh 31, Pathianni ve veah zing dar 9 aṭanga zan dar 9 inkarah lirthei tlân khap a ni. Thupek hian chhiatrupna thil, kângmei leh rîkrum kaihhnawiha duty leh dan leh thupek pawimawh bika duty-te chetvelna a huam lo ang.

Mipui ngen
Aizawl West-I Block Congress & ZPM Joint Campaign Committee chuan nimin khan Sairangah inkhawm an buatsaih a; Lok Sabha inthlanpui leh Aizawl West-I MLA bye-election awm turah Mizo ram, hnam leh sakhua chhanhim a nih theih nan mipui candidate Lalnghinglova Hmar (MP) leh Lalbuanga Sailo (MLA) te thlang tlin ngei turin mipui an ngen.

Pawi khawihtu dem
Falkland Taxi Stand Welfare chuan thuchhuah siamin, an member Vanlalrawna, March 21, 2019 tlai dar 6 vela hnam dang pakhatin a vawthlu leh damdawi-ina dah luh a ngai hial chu an dem thu an tarlang. Pawi khawihtu chu a phû tâwk hremna pe ngei tura thuneitute an beisei thu leh, damdawi-ina a inenkawlna senso leh hna a thawh theih loh chhung hu zangnnadawmna pe ngei turin pawi khawihtu an phût tih an sawi bawk.

Cycle Rally
Poshan Abhiyaan (National Nutrition Mission) kum khat tlin lawm nana awareness campaign khârna atan Serchhip DC office chuan nimin khan Serchhipah Cycle Rally an buatsaih a, DC pisa tual aṭangin district bawrhsap Sangchhin Chinzah-in a vai liam. Rally-ah hian sikul naupang ṭhahnem tak an tel a, thilpek hlan vek an ni.

Thenzawl tlawh
ZOHANDCO chairman thar C Lalrammawia chuan nimin khan Thenzawl a tlawh a, Thenzawl Handlooms Weaver's Association-te nen an inkhawm a, puantahtute'n an harsatnate an lo thlen.