World Water Day hman a ni

Nimin khan district khawpui hragn hrangah PHE department leh YMA huaihawtin World Water Day hman a ni a, thupui chu 'Leaving no one behind' (tumah hmaih awm loin) tih ani.

World Water Day hi Aizawlah chuan Vanapa Hall-ah hman a ni a, chief secretary Lalnunmawia Chuaungo-in a hmanpui. Day puala tui pawimawhna thu inziahsiak (essay competition)-a ti ṭhate hnenah lawmman sem a ni a, pakhatna chu Lalthansanga Ralte, Ramhlun Venglai niin, lawmmanah Rs. 5,000 hlan a ni.

Lungleiah chuan Convention Centre-ah hman a ni a, Lunglei DC K Lalrinzuali'n a hmanpui. K Lalrinzuali chuan, United Nations-in hmasawnna ngêlnghet siam turin UN 2030 Agen­da atan kum 2015-ah Sustainable Development Goals a puang a, tui intlak chhawp chhuah chu goal lian 17 zinga 6-na a nih thu a sawi a, "Rilṭám leh rethei awm lohna tura pawimawh ber chu tui thianghlim hi a ni," a ti.

World Water Day hi Serchhipah chuan PHE department hnuaia Swachh Bharat Mission (Gramin) huaihawtin DC Conference Hall-ah hman a ni a, district bawrhsap Sangchhin Chinzah-in a hmanpui. Serchhip khawpui chhunga YMA branch hrang hrang leh district chhung khaw tina WATSAN Committee-te hnenah tui humhalh a ṭulzia inzirtirna kawnga hmalakna atan Rs. 10,000 ṭheuh pek a ni. Zingah Serchhip Bazarah pungkhawmin, tui humhalh tura intiamna thu an chham rual bawk.

Mamitah chuan IPR Conference Hall-ah hman a ni a, Mamit DFO Lalnunsanga Khawl­hring khuallian a ni. Mamit khawpuia sorkar department aiawh te, tlawmngai pawl hrang hrang aiawhte leh khawtlang hruaitute an tel.

Siahaah chuan MADC Forest Hall-ah PHE department bul­tumin hman a ni a, DRDA project director T Vanlalmalsawmsanga khuallian niin, MTP president PP Zalena khualzahawm a ni.

Champhaiah chuan PHE department leh YMA Sub-Hqrs. buat­saihin Zotlanga DIET Hall-ah hman a ni a, Champhai DFO C Lal­biaka Khuallian a ni. Tuihna humhalh kawnga YMA leh PHE department thawhhonaa hmalaknate tarlan a nih bakah, zawhna leh chhanna hun hman a ni a ni.

Mizoram Environ­mental Information System (ENVIS) Hub pawhin Women’s Polytechnic Eco Club member-te chuan World Water Day an hmang a, Tlawng luia PHE Water Treatment Plant Site-ah plastic bawlhhlawhte leh lui tibawlhhlawhtu hnawmhnawk thianfaiin an hnatlâng.

World Water Day - March 22 hi UN Conference on Environ­ment and Development-in tui in tlak lawmna ni atan 1993-ah a thlang a, kum 1993 aṭangin kum tin hman a ni.