Hawla'n Congress thawhpui BJP leh MNF thawhpui BJP dinhmun a khaikhin

Mizoram Pradesh Congress Committee (MPCC) president Lal Thanhawla chuan, Chakma Autonomous District Council-a Congress party-in BJP an thawh­puite chu Chakma Buddhist an nih thu sawiin, "Râwt thak tham lek an ni a, MNF check nan thawhpui a ṭul a ni," a ti a; MNF-in BJP an thawhpui ve erawh chu India ram pum BJP-NDA leh hmarchhak pum huap BJP-NEDA an nih avangin, Mizoram leh Mizote tan an hlauhawm bik tih a sawi.

Nimina Congress Bhavan-a political session-ah thu sawiin Lal Thanhawla chuan, MNF-in an thawhpui BJP-te chu sorkar laipuiah an sorkar leh chuan Citizenship (Amendment) Bill (CAB) tihnun leh tumtu, India ram Hindu rama siam tumtu leh Hindu kalphung (Uniform Civil Code)-a India ram mipui kalpui tumtu an nih thu a sawi a, "MNF-te hian 'BJP kan thawhpui lo, CAB kan do,' han ti ṭhin mah se, mipui bum theih an neih ka ring lo," a ti.

CAB chungchangah hian Hawla chuan, "Congress chuan sorkar laipuiah a sorkar a nih chuan CAB a siam dawn lo a ni tih AICC president Rahul Gandhi-a'n a puang tawh," a ti a; Congress a sorkar loh pawhin party dang sorkarin CAB an siam dawn a nih chuan Congress chuan a do dawn tih Rahul Gandhi-a'n a puan tawh thu a sawi.

Lok Sabha inthlan tura ZPM nena an thawh dun chungchangah Lal Thanhawla chuan, "Democracy-ah chuan tam a pawimawh ber a, tam loh chuan a chak theih loh. Party dangte nena lungruala thawhho theih chuan, chu tluka thil ṭha a awm lo," a ti. India rama Congress party boruak a ṭha tial tial a, BJP dinhmun a hniam tial tial nia sawiin, "BJP pawh an mangang a, state tinah thawhpui tur an zawng mek a ni," a ti.

MPCC President chuan, Mizo­rama rotling zawng zawng chu Congress kaihhruai sorkar kut chhuak a nia sawiin, "MIMER te hi naupang tê a la ni a, tihchhiat leh a ni ang tih a hlauhawm hle a ni," a ti a; NLUP avangin Mizoramin hma a sawn thu te, Gross State Domestic Product (GSDP) leh per capita income nasa taka a pun thute a sawi bawk.